भांगरभूंय | प्रतिनिधी
भांगरभूंय । प्रतिनिधी
म्हापशेंः अस्नोड्या एके बायलेच्या गळ्यांतली 12 ग्राम वजनाची एक लाख रुपया मोलाची भांगराची सरपळी झोमून व्हरपी अश्पाक दादापीर कादर (25) आनी हुसैन अब्दूल रशीद (23) ह्या न्यू वाडें- वास्को हांगच्या चोरांक कोलवाळ पुलिसांनी सोदून काडून अटक केली. अश्याक हो खांपो चोर आसा आनी राज्यांतल्या वेगवेगळ्या पुलीस स्टेशनांनी ताचे आड गुन्यांव नोंद आसात.
इवारिस्ता डिसोझा हिच्या गळ्यांतली सरपळी गणेशनगर- अस्नोडे हांगा स्कुटरीन येवन ह्या चोरांनी झोमून व्हेल्ली. बिरेस्तारा पुलिसांनी तांचे आड लूक आवट नोटीस काडिल्ली. फाटल्या 2 नोव्हेंबराक सकाळी ही चोरयेची घडणूक जाल्ली. कोलवाळ पुलिसांनी सीसीटीव्ही फुटेज पळोवन ताचे फोटो आशिल्ली लूक आवट नोटीस काडिल्ली. ती वास्को पुलीस स्टेशनांतल्या पुलीस कॉन्स्टेबलान पळयली आनी तो अश्याप हाका वळखलो. कोलवाळ पुलिसांनी वास्को पुलिसांचे मजतीन दोनूय चोरांक ताब्यांत घेतले.
चोरी करपा खातीर तांणी वापरिल्ली स्कूटर पुलिसांनी जप्त केल्या. म्हापशेंच्या पयलो वर्ग न्यायालयान तांका तीन दिसांची पुलीस कादय दिल्या. कोलवाळचो निरीक्षक सोमनाथ माजीक हांच्या मार्गदर्शना खाला उपनिरीक्षक कुणाल नायक तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
