सेलेब्रिटींचो फायदो जावचो!

भांगरभूंय | प्रतिनिधी

राज्याचे अर्थवेवस्थेक सध्या पर्यटन मळ सगल्यांत चड दुडू दिता, अशें म्हणल्यार अतिताय थारची ना. म्हणटकच तें दुयेंत पडचेंना, हें पळोवक दरेका गोंयकाराची लागणूक.

चीन खरी निजाची म्हासत्ता. अमेरिका आडेची. कारण अमेरिकेची पालखी नाचयतात, रथ ओडटात ते चडशे थंय स्थायिक जाल्ले भायले लोक. तातूंत आमचे भारतीयूय आसात. हे भायले कायद्यान थंयचे नागरीक जाल्यात. चीनाचें तशें ना. थंय भायले चडशे नात. कारण चिनी भास कोणाक येना आनी थंय बंधनाय चड. खूबच खरपणान वागपी कम्युनिस्टांक लागून हो देश वयर सरला अशें कांय जाणांचें मत. आसूं. फक्त ज्यू लोक भायर सरले जाल्यार अमेरिकेची अर्थवेवस्था कोसळटली, अशें जाणकार सांगतात. हाचे वयल्यान अमेरिकेच्यो नाडयो कोणा- कोणाच्या हातांत आसात ताची सुलूस लागतली. आमच्या दक्षीण भारतीय भावांनी म्हयनोभर सुटी घेतली जाल्यार आय टी मळ घुस्मटलें. कोणे खंयच्याय देशांत, राज्यांत स्थलांतर केलें जाल्यार त्या देशाचे उदरगतीत हातभार लावंक जाय. निदान थंय कायद्यान रावपाक जाय. ‘कामा पुरतो मामा’ जावन न्हय.
गोंयचीच गजाल घेयात. अतोनात पयसो आशिल्ल्या दरेकल्यान हांगा घर, बंगलो घेतला, बांदला. तांणी गोंयांत स्थायीक जावन आपलें ज्ञान, कलेचो फायदो गोंयकारांक जावचो, हे खातीर वावरूंक नाका? मात ते फक्त सुटयेंत मजा मारपाक हांगा येतात. हरकत ना. पूण, निदान तांणी बेकायदेशीर गजाली तरी करपाक जायनात. हालींच आदलो क्रिकेट खेळगडो युवराज सिंग आपलो मोरजेचो बंगलो वेवसायीक कारणां खातीर वापरता म्हूण पर्यटन खात्यान ताका नोटीस धाडल्या. वेवसाय करपाक सरकारा कडेन नोंदणी करची पडटा. परवाने घेवचे पडटात. मात, तशें करीनासतना युवराज तो बंगलो भाड्यान दिता, अशें ताच्या ट्विटा वयल्यान दिसता. अशे शंबरां वयर उद्देजक, सेलिब्रिटी आसात. ते सोशल मिडियाचेर जायरत दिवन आपापले बंगले भाड्यान दितात. कसलोच परवानो घेनासतना हें भायल्या भायर चलता. तांणी हाॅटेलां परस आपलो बंगलो सवाय भितर दिलो जाल्यार सरकाराची कितली येणावळ बुडली ताचो फक्त हिशोब करचो. दर्यादेगां वयल्या बऱ्याच लोकांनी ल्हान- ल्हान कुडी काडून भाड्यान दिल्यात. तांणीय नोंदणी केल्या काय ना तें पळोवचें. आतां पर्यटन खात्यान खास पंगड तयार केलाच. सगले कडेन वचून बारीकसाणेन चवकशी, तपास करचो.
कोट्यधीश, अब्जाधीश भारतीय अशे वागतात. मागीर गरिबांनी पोटा खातीर दर्या वेळांचेर गुपचूप खेळणी, कपडे, खाणां विकलीं जाल्यार तांकां खंयच्या तोंडान दोश दिवपाचो? हे बंगले शांत रानांनी, दर्या वेळे कुशीच्या दोंगुल्यांचेर उबारल्यात. तांकां परवानो दितना पंचायतींनी पर्यावरणाचो विचार केला आसतलो काय? झाडां, दोंगर कापल्या आसतले काय? ही जमीन कोणाचे मालकेची? सामान्य मनशाक घर बांदतना धा फावटी मारपाक लावपी पंच, सरपंचांनी सगले दाखले त्या सेलिब्रिटींक तो रावता थंय व्हरून दिल्यात आसतले काय? पर्यटन खात्याच्या चवकशी पंगडान, सोशल मिडिया पंगडान हाचीय चवकशी करची.
दुसरी म्हत्वाची गजाल, म्हणल्यार ट्रॅव्हल एजंट, उदका खेळ आयोजक, गायड, हेर वेवसायीक हांचेरूय पर्यटन खात्यान नदर दवरल्या तें बरें केलें. कोणूय येता, टाय मारून येस, फेस करीत लोकप्रतिनिधीचेर इंप्रेशन मारता, परवानो मेळयता आनी आपलो वेवसाय सुरू करता. हातूंतले कांय जाण सरळ थळाव्या लोकप्रतिनिधींक वा सरकारी यंत्रणेक हाता कडेन धरून परवान्या बगर जाय तो वेवसाय करतात. ‘आव जाव, घर तुम्हारा’ अशी गोंयची गत जाल्या. सगलेच बेकायदेशीर वेवसाय करतात, सगलेच गुन्यांवकार अशें कोण म्हणचोना. तरीय सगल्यांची चवकशी जावप गरजेचें.
युवराज सिंगाच्या बंगल्याचें प्रकरण भायर सरलें, त्याच सुमाराक उच्च न्यायालयान एक निकाल दिला. पर्यटन हंगाम सुरू जातकच दर्यादेग वाठारांत बेकायदो बांदकामां उबीं जातात, हेर गैरप्रकार घडटात. अशें जाल्यार ताका हाचे मुखार पंचायत आनी पुलीस जापसालदार आसतले. बांदकामां आड बेगोबेग पावलां उबारपाचोय आदेशून न्यायालयान दिला. वागातोरा जीटीडीसीचे जमनीचेर बेकायदेशीर बांदिल्लें बांदकाम मोडिल्लें. तें परत उबारले. आतां तें परत मोडून आठ दिसांत पांच लाख रुपया भरपाचो आदेश न्यायालयान दिला. पंचायतीची नोटीस कोयराचे बालदेंत उडोवन सरकारी यंत्रणेन मोडिल्लें बांदकाम परत बांदप हें व्हड धाडस. कोणाचो तरी आशिर्वाद आसले बगर हें शक्य आसा? ओगीच लोकप्रतिनिधी, पक्ष वावुरपी जावपाक लोक धडपडनात!!
राज्याचे अर्थवेवस्थेक सध्या पर्यटन मळ सगल्यांत चड दुडू दिता, अशें म्हणल्यार अतिताय थारची ना. म्हणटकच तें दुयेंत पडचेंना, हें पळोवक दरेका गोंयकाराची लागणूक.