महिला केंद्रीत चित्रपट तयार जावपाक जाय

भांगरभूंय | प्रतिनिधी

मिनाक्षी शेंडेः ‘हिंदी चित्रपटांत बायलांचो वांटो’ विशयाचेर मास्टरक्लास

भांगरभूंय । जयश्री देसाय

पणजीः कितल्याशाच वर्सां सावन बॉक्स ऑफिसाचेर हीट जाल्ल्या चडशा चित्रपटांनी बायलांची एकूच बाजू आशिल्ली भुमिका दाखयल्या. ताका लागून समाजांत अस्तुरेची प्रतिमा संचुकीत आनी मर्यादीत जाल्या. हें बदलपा खातीर स्त्रीकेंद्रीत चित्रपट तयार जावपाक जाय, अशें मिनाक्षी शेंडे हांणी सांगलें. टाटा इन्स्टिट्यूट ऑफ सोशल सायन्सच्या मिडिया स्टडी वतीन आयोजीत परिसंवादांत ती उलयताली.

हिंदी चित्रपटांतलो लिंगाचेर आदारीत वांटो ह्या विशयाचेर परिसंवादाचें आयोजन केल्लें. मिडिया स्टडीजची डीन डॉ. लक्ष्मी लिंगम हांणी लॉकडावनच्या काळांत 2012 ते 2019 ह्या काळांत बॉक्स ऑफिसाचेर हीट जाल्ल्या चित्रपटांचो अभ्यास करून केल्लो एक अहवाल ह्या वेळार सादर केलो. तातूंत अस्तुरी केंद्रींत सिनेमांची, सिनेमांतली मुख्य नायिका, सहनायिका म्हूण काम करपी बायलां, दादले आनी तृतीयपंथियांची आंकडेवारी सादर केली. अस्तुरी केंद्रींत 36 टक्के सिनेमांचो आसपाव आशिल्ल्याचें तांणी सांगलें.

नायिका म्हूण 57 टक्के बायलो काम करतात पूण नायकांची भुमिका चड म्हत्वाची आसता. सहनायिका म्हूण 60 टक्के बायलो, रॉमेंटीक सहनायिका म्हूण फक्त 25 टक्के आनी फक्त रॉमेंटीक भुमिका 19 टक्के बायलो करतात, अशें शेंडे हांणी सांगलें.

पड्ड्याचेर काम करपी दरेके नायिके फाटल्यान 8 बायलो काम करतात. ज्यो व्हिज्युएल इफेक्टस्, निर्मिती, संगीत, वेशभुशा, रंगभुशा आनी वितरण ह्या सारक्या विभागांनी काम करतात. मात तरी लेगीत तांचें प्रमाण खूब उणें आसा. ह्या काळांत हीट चित्रपटांत 25 हजार लोकांनी बॅकस्टेज काम केलां. मात तातूंत बायलांचो आंकडो फक्त 4131 इतलो आसा. बॉक्स ऑफिसाचेर हीट जाल्ल्या चित्रपटां खातीर काम करपी बायलांचें प्रमाण 13.2 टक्के जाल्यार महिला केंद्रीत चित्रपटां खातीर काम करपी बायलांचें प्रमाण फक्त 15 टक्के आशिल्ल्याचें शेंडे हांणी सांगलें.

ह्या संशोधना खातीर खूब जाणां कडेन संवाद सादला, अशें प्रा. शिल्पा फडके हांणी सांगलें. बायलां खातीर बरे संहितेची गरज आसा, अशेंय तांणी सांगलें.

रश्मी लांबा हांणी सांगलें, फुडले पिळगे मुखार बायलांची प्रतिमा बदलपा खातीर तशा चडांत चड चित्रपटांचेर काम करपाक जाय.

प्रशासकीय विभागांतूय बायलांचें प्रमाण उणें…

बायलांचें प्रशासकीय विभागांतकाम करपाचें प्रमाण लेगीत खूब उणें आसा. स्वातंत्र्या उपरांत फाटल्या 75 वर्सांत देशांत फक्त 4 बायलो म्हायती आनी प्रसारण मंत्री जाल्यो. जें प्रमाण फक्त 14 टक्के आसा. चित्रपट म्हामंडळाचेर फाटल्या 72 वर्सांत फक्त 4 अधिकारी बायलांची निवड जाल्या. हें प्रमाण 14 टक्के आसा. जाल्यार 13 वर्सांत 29 टक्के बायलो मंडळाच्यो वांगडी जाल्यो. दादासाहेब फाळके पुरस्कार मेळोवपी बायलो फक्त 12 टक्के आसात, अशी म्हायती डॉ. लक्ष्मी लिंगम हांणी दिली.

सिनेमांत सादरीकरण चड म्हत्वाचें: कृपलानी

आपली ल्हानपणा सावन जाल्ली जडणघडण आपणे केल्ल्या त्रिशूल आनी इफ्फींत दाखयिल्ल्या गोल्डफीश सारक्या सिनेमां खातीर फायद्याची थारली, अशें दिग्दर्शक पुषम कृपलानी हांणी सांगलें. तशेंच सिनेमांत सादरीकरण चड म्हत्वाचें आशिल्ल्याचेंय तांणी सांगलें.