भांगरभूंय | प्रतिनिधी
भांगरभूंय । प्रतिनिधी
पेडणेः मोपा विमातळाचें बांदकाम करपी जीएमआर कंपनीनी राष्ट्रीय म्हामार्गार लायिल्ले ‘न्यू गोवा इंटरनॅशन ऍरपोर्ट मोपा’ हे नांव तकेट बेगोबेग काडून उडोवपाची मागणी भाऊसाहेब बांदोडकार मोपा विमानतळ नांवकरण समितीन केल्या. तकटे काडले ना जाल्यार एमजीआर कंपनीच्या कार्यालयाचेर मोर्चा व्हरपाची शिटकावणी समितीचो अध्यक्ष सुभाष केरकार हांणी बिरेस्तारा घेतिल्ले पत्रकार परिशदेंत केली. ह्या वेळार प्रा. गजानन मांद्रेकार, रुपेश नायक, विनायक च्यारी, रामदास मोरजे, समीर परवार, नारायण गडेकार हाजीर आशिल्ले.
मोपा विमानतळाक भाऊसाहेब बांदोडकार हांचें नांव दिवचें अशी मागणी फाटल्या तीन वर्सां सावन आमी करीत आसात. विमानतळाक न्यू गोवा इंटरनॅशनल ऍरपोर्ट अशें नांव दिवपाचो अधिकारी जीएमआर कंपनीक केंद्र सरकारान दिल्या काय कितें, न्यू गोवा खंयच्यान आयला असो प्रश्न तांणी विचारला. मोपा विमानतळाक भाऊसाहेबा बगर दुसऱ्या नांवाचो आमी विचार लेगीत करपाक शकनात. राष्ट्रीम म्हामार्गार जीएमआर कंपनीन लायिल्ले तकटे काडचे हे खातीर सरकारान आमकां आंदोलन करपाक लावचें न्हय अशें तांणी सांगलां.
एक गोवा आसतना न्यू गोवा तयार करपाचो अधिकार सरकारान जीएमआर कंपनीक दिला जाल्यार तशें जाहीर करचें अशें विनायक च्यारी हाणे सांगलें. मोपा विमानतळाक भाऊसाहेब ना जाल्यार मनोहर पर्रीकार हांचें नांव दिवपाची शिफारस गोंय सरकारान केली तरी ताका फकत भाऊसाहेब हांचेंच नांव दिवपाचे मागणेक 80 टक्के गोंयकाराचों तेंको आसा अशें गजानन मांद्रेकार हांणी सांगलें.
विमानतळाक मोपा गांवचें
नांव दिवचेंः आरपीआय
भांगरभूंय । प्रतिनिधी
दिवचलः मोपा विमानतळाक डॉ बाबासाहेब आंबेडकार वा भाऊसाहेब बांदोडकार हांचें नांव दिवप शक्य ना जल्यार ताका मोपा गांवचेंच नांव दिवचें अशी सूचोवणी
रिपब्लिकन पार्टी ऑफ इंडियाच्या दिवचल फांट्याचो अध्यक्ष अमीत कोरगांवकार, कार्याध्यक्ष दिना मुळगांवकार आनी सचीव तुळशीदास परवार हांणी केल्या. बाबासाहेब आंबेडकार हांचें विमानतळाक नांव दिवचें अशी आमची पयली मागणी आसा, अशें तांणी पत्रकार परिशदेंत सांगलें.
मोपा गांवांतल्या लोकांनी विमानतळा खातीर आपली जमीन दिल्या. ताका लागून बांदोडकार वा आंबेडकार हें नांव दिवपाक जायना जाल्यार मोपो विमानतळ हेंच नांव दिवपाक आमची हरकत ना अशें दिना मुळगांवकारान सांगलें. कांय गिरेस्त लोकांनी बीपीएल रेशनकार्डा घेवन सरकारी सवाय धान्याची लूट चलयल्या अशें सागूं ताचीं नांवा उक्ती करतले अशें तुळशीदास परवार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
