भांगरभूंय | प्रतिनिधी
वरूण शर्माः उर्जा तिगोवन दवरप गरजेचें
भांगरभूंय । प्रतिनिधी
पणजीः विनोद करप म्हणल्यार दिसता तितलें सोंपें नासता. विनोदी भुमिका मदींच सगळ्यांत चड मेहनत घेवची पडटा. एका सिनेमांतली उर्जा दुसऱ्या चित्रपटांत कायम दवरचे खातीर तुमकां स्वताचेर नेमान काम करचें पडटा. हेच खातीर विनोद हो खूब गंभीर वेवसाय आसा, अशें अभिनेतो वरूण शर्मा हांणी सांगलें.
‘फुकरे’ ह्या सिनेमांतल्यान तांकां मेळिल्ली प्रसिद्धी, ते उपरांत नेमान मेळिल्लो भुमिका, विनोदी अभिनेतो म्हूण थिरावल्ल्याची खोस, अश्यो खूबश्यो गजाली तांणी प्रेक्षकांक सांगल्यो. ‘फुकरे’ चित्रपटाच्या तिसऱ्या भागाच्या निमतान तांचे वांगडा दिग्दर्शक म्रिगदीप सिंग लांबा हांणी प्रेक्षकां वांगडा संवाद सादलो.
विनोदी चित्रपट करतना सेटा वयलें वातावरण खूब म्हत्वाचें आसता, अशें दोगांनीय सांगलें. अभिनेत्या खातीर आशीकुशीक सकारात्मकता आसप खूब गरजेचें आसता. तातूंतल्यानूच ताका आपली भुमिका बरी करपाक मजत मेळटा, अशें वरूण हांणी सांगलें.
दिग्दर्शका खातीर पुराय प्रक्रियेंत खूब तणाव आसता. सगळ्यो गजाली जाग्यार घालप, सगळें वेवस्थीत जावचें खातीरचो तणाव तो हाताळटा. ह्या वेळार अभिनेते आनी ह र पंगडा कडल्यान मेळपी उर्जा उर्बादिणी आसता, अशें लांबा हांणी सांगलें. मजगतीं, प्रेक्षकांच्या प्रस्नांक जाप दितना शर्मा हांणी खूबश्यो गजाली सांगल्यो. एकादी नवी भुमिका साकार करचे खातीर आदींचें सगळें विसरप गरजेचें आसता, जें खूब कठीण आसता. हे मुखार ग्रे शेडीच्यो तशेंच थ्रिलर चित्रपटांनी काम करपाक आवडटलें, अशें तांणी सांगलें. हासत खेळत जाल्ल्या ह्या सत्राचो प्रेक्षकांनी खूब आनंद घेतलो.
दरेक दिग्दर्शक नवें दिवपाक शकता
एकेच तरेचें चित्रपट करपी खूबशे दिग्दर्शक त्या प्रकारांत दर खेपे कितें तरी नवें दिवपाक शकता. दरेकल्याची कल्पनाशक्त वेगळी आसता अशें लांबा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
