अभिनय आपले जिणेचें एक आंग

भांगरभूंय | प्रतिनिधी

अनुपम खेरः प्रेक्षकां कडेन गजाली मारतना दिले सकारात्मकतेचे धडे

भांगरभूंय । प्रतिनिधी

पणजीः अभिनेतो म्हूण विशिश्ट धारणा बाळगून काम करप चुकीचें. मेळपी दरेक भुमिका प्रामाणीकपणान करप म्हत्वाचें. पूण एक मनीस म्हूण आपूण धर्मीक आसा. तें आपले वैयक्तीक जिणेचें आंग. तेचवरी अभिनय आपले जिणेचें एक आंग आसा. इफ्फींत आयोजीत मास्टर क्लासींत एका प्रस्नाक जाप दितना अभिनेतो अनुपम खेर हांणी हें सांगलें.

अभिनयाच्या प्रवासा विशीं उलयतना अनुपम खेर हांणी सांगलें, जल्माक येतनाच कोणीच अभिनेतो आसना. आपल्या पयल्या नाटकांत आपणें खुबूच वायट काम केल्लें. पूण केल्ल्या यत्नांचें बापायन कवतूक केल्ल्यानूच आपूण उपरांत काम करीत रावलों. तांणी सांगिल्लें एकादी व्यक्ती केन्नाच अपेशी जायना. घडिल्ली घडणूक अपेसी थारायता. ताका लागून स्वता वयलो विस्वास केन्नाच वचपाक दिवं नाका.

भारतीय सिनेमा हो दरेका मनशाचें आंग आसा. लोक सिनेमाक लागून प्रेरीत जातात. आपले जिणेंतल्या घडणुकांचो संदर्भ ते सिनेमांतल्या प्रसंगा कडेन जोडटात. ताका लागून आपूण प्रामाणीकपणान काम करपाक जाय. प्रशिक्षण घेवपाक जाय. सराव करपाक जाय. सरावान आत्मविस्वास वाडटा. सगळे यत्न करपाक जाय. आपले परस चड हुशार लोकां वांगडा रावपाक जाय. सेगीत लोकां कडेन संवाद करपाक जाय. अशा सकारात्मक उतरांनी तांणी प्रेक्षकांचीं मनां जिखलीं. गजाली मारता मारता तांणी आपल्या सिनेमांतले कांय संवाद लेगीत उलोवन दाखयले.

बरो अभिनेतो जावचे खातीर तुमची निरिक्षण शक्त बरी जाय. कल्पनाशक्त लेगीत सृजनशील जाय. स्मरणशक्त बरी आसत जाल्यारूच कल्पनाशक्त आनी निरिक्षणाचो फायदो जाता. ताका लागून हे तिनूय गजाली एका अभिनेत्याचे खूब म्हत्वाचे गूण आसात, अशें अनुपम खेर हांणी सांगलें.

शिक्षक खूबशा जाणांची जीण घडयता. खूब जाणांक मार्ग दाखयता. हेच खातीर आपणे अभिनय शिकोवपाची संस्था सुरू केल्या. फुडारांत लोकांनी आपल्याक अभिनेत्या परस शिक्षक म्हूण उगडास दवरचो, अशें खेर हांणी ह्या वेळार सांगलें. पंकज दुबे हांणी अनुपम खेर हांचे कडेन संवाद केलो.

प्रचार केन्नाच नासता

एका प्रेक्षकान अनुपम खेर हांकां चित्रपटांतल्या प्रचारा विशीं तुमकां कितें दिसता, अशें विचारलें. तेन्ना ताका जाप दितना तांणी सांगलें, प्रचार बी कांयच आसना. लोकांक तशें दिसता. त्यो भुमिका आसतात. खूब जाणांक द काश्मीर फायल्स, एक्सिडेंटल प्रायम मिनिस्टर हे चित्रपट तशे कशे दिसतात. पूण प्रत्यक्षांत तशेंच कांयच ना, अशें तांणी सांगलें.

आनी ताचो मोबायल फोन काडून घेतलो

सत्राचे सुरवेक पयलेच रांकेंतलो एक तरणाटो कॉल घेवचे खातीर सभाघरा भायर वचपाक लागलो, तेन्ना अनुपम खेर हांणी ताका आडायलो. ताचो मोबायल फोन काडून घेतलो आनी सत्राचे अखेरेक ताका परतून दिलो. एक तरणाटो जांबय काडटालो जाल्यार ताचे कडेन वचून ताच्या तोंडाचेर उदक मारलें.

मनांतली दरेक गजाल करात…

‘सारांश’ ह्या चित्रपटांत आदीं नायकाची भुमिका दिल्ली. शुटिंगेक 10 दीस आसा म्हणल्यार आपली भुमिका संजीव कुमार हांकां दिल्ल्याचें कळ्ळें. सगळें सोडून परतून वतालों. वतां वतां भट हांकां मेळ्ळों. सगळी तिडक तांचेर काडली. म्हजें उलोवन सोंपतकच तांणी निर्मात्यांक कॉल केलो आनी सांगलें, नायकाची भुमिका अनुपमूच करतलो. ही गजाल सांगतना खेर हांणी सांगलें, मनांतली दरेक गजाल करात.