भांगरभूंय | प्रतिनिधी
भांगरभूंय । प्रतिनिधी
म्हापशेंः म्हापशें पालिका मार्केटांतलो पे पार्किंग कंत्राटदार दुचाकीवाल्यां कडल्यान चड फी घेता म्हणून कागाळी आयल्या उपरांत पालिका मंडळाचो उपनगराध्यक्ष तशेंच मार्केट समितीच्या अध्यक्षान ताका चड फी घेनाका अशी शिटकावणी दिल्या. मार्केट वेपारी संघटनेच्या पदाधिकाऱ्या वांगडा तांणी मार्केटाची पळोवणी करून अतिक्रमणाचेर कारवाय करून मार्केटाच्या दारा कडेन आशिल्ले आडमेळे काडपाचो निर्णय घेतलो.
सिरसाट बिल्डिंगे सामकारचे पार्किंग सुवातेंत दुचाकीवाल्यां कडल्यान कंत्राटदार पांचे सुवातेर धा रुपया पार्किंग फी घेतना अशी कागाळ पालिका मंडळा कडेन केल्ली. ताका लागून उपनगराध्यक्ष चंद्रशेखर बेनकार, मार्केट समितीचो अध्यक्ष आनी नगरसेवक विराज फडके हांणी खबर काडली तेन्ना कंत्राटदार चड फी घेता हें दिसून आयलें. मार्केटांत पयल्या दोन वरां खातीर पांच आनी ताचे परस चड वेळ पार्किंग केल्यार 10 रुपये फी घेवपाचो नेम आसा. तरीय कंत्राटदार सगळ्यां कडल्यान सरसकट धा रुपये घेता.
मजगतीं, बेनकार आनी विराज फडकेन म्हापशें वेपारी संघटनेचो अध्यक्ष श्रीपाद सावंत आनी हेर पदाधिकाऱ्यांक वांगडा घेवन मार्केटाची पळोवणी केली. मार्केट यार्डाच्या दारा कडेन विक्रेत्यांनी केल्लें अतिक्रमण काडून तांणी म्हाल जप्त केलो. मार्केटांत पडल्लीं फोंणकुलां पुरोवपाचें पालिका मंडळान थारायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
