भांगरभूंय | प्रतिनिधी
भांगरभूंय । प्रतिनिधी
पेडणेः पेडणे तालुक्यांतल्या मोपा हांगच्या ग्रीन फिल्ड विमानतळाक नांव दिवपा खातीर वेगवेगळीं नांवा सूचोवपाचें काम सध्या सुरू आसतना ह्या विमानतळाचें बांदकाम करपी जीएमआर कंपनीन मात ताका ‘न्यू गोवा इंटरनॅशनल ऍरपोर्ट मोपा’ अशें नांव दिवंन राष्ट्रीय म्हामार्गार तशे तकटे लायिल्ल्याचें दिश्टी पडटात.
ह्या विमानतळाक गोंयचे पयले मुख्यमंत्री भाऊसाहेब बांदोडकार, आदले मुख्यमंत्री आनी देशाचे संरक्षण मंत्री मनोहर पर्रीकार, आदले विरोधी पक्ष फुडारी जॅक सिक्वेरा तशेंच सुटके सेनानी टीबी कुन्हा हांचें नांव दिवचें अशी मागणी सध्या जाता आनी सरकाराक तशी निवेदना सादर करपाचें काम चल्लां. मात जीएमआर कंपनीक न्यू गोवा इंटरनॅशनल ऍरपोर्ट अशें नांव जाहीर करून नांवकरणाच्या ह्या वादाचेर पड्डो उडयला अशें दिसता.
भाऊसाहेब बांदोडकार वा मनोहर पर्रीकार हांचें विमानतळाक नांव दिवपाचे मागणेन सध्या नेट घेतला. विमातळा खातीर जमीन दिल्ले मोपा हांगचे शेतकार तशेंच पेडण्यांतल्या लोकांक विमानतळाक बांदोडकार हांचें नांव दिल्लें जाय. भौशीक आनी खाजगी तत्वाचेर (पीपीपी) ह्या विमातळाचें बांदकाम करपी जीएमआर कंपनीन मात ज्या नांवान हो विमातळ बांदपाचें काम केलां तेंच कायम करून राष्ट्रीय म्हामार्गाव वेगवेगळ्या सुवातांनी तशें नांव तकटे लायल्यात.
मोपा आंतरराष्ट्रीय विमानतळ राष्ट्रीय विमानतळ प्राधिकरणाच्या म्हणल्यार केंद्र सरकाराच्या अधिकार क्षेत्रांत येता. नांव दिवपा संबंदी वेगवेगळी नांवा सूचयल्यात ते खातीर राज्य सरकारान नांव दिवपाचें काम केंद्र सरकाराचें अशें सांगून नांवकरण वादांतल्यान सध्या आंग काडून घेतलां. मात विमातळाक भाऊसाहेब बांदोडकाराचें नांव दिवचें अशी गोंयांतल्या साबार लोकांची मागणी आसा. तातूंत खो घालपा खातीर हेर फुडाऱ्यांनी नांवा सूचोवपाचें काम चल्लां अशी चर्चा सध्या सुरू आसा.
जीएआर कंपनींन न्यू गोवा इंटरनॅशनल ऍरपोर्ट मोपा अशें नांव खंयच्या अधिकाऱांत दिलें आनी तशे तकटे कशे लायले, हे चर्चा सध्या लोकां मदीं चलिल्ली दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
