भांगरभूंय | प्रतिनिधी
भांगरभूंय । प्रतिनिधी
म्हापशेंः भाजपाचो पेडणेचो आमदार प्रवीण आर्लेकार हांणे आपल्या घरांत मीटर नास्तना उदका कनेक्शन घेतलां. उदक चोरपाचो हो प्रकार आसा. ताची चवकशी करची अशी मागणी काँग्रेसचो म्हणयारो संजय बर्डे हांणे केल्या. ह्या प्रकाराक लागून आर्लेकाराक आमदार म्हणून अपात्र थारावचें अशी मागणी करपी याचिका आपूण सादर करतलों अशें तांणी म्हापश्यांत पक्षाचे कार्यालयांत घेतिल्ले पत्रकार परिशदेंत सांगलें.
आमदार आर्लेकाराचे धारगळा घऱ आसा. ताचो नामो तांणी विधानसभा वेंचणूक प्रतिज्ञापत्रांत दिला. थंय मीटर नास्तना उदका कनेक्शन घेतलां असो बर्डे हाचो आरोप आसा. ह्या प्रकारा आड आपणे पेडणे पुलीस स्टेशन आनी बांदकाम खात्याच्या उदका पुरवण विभागा कडेन कागाळ केल्या. आपणे कागाळ केल्या उपरांत आयतारा ह्या घराक दिल्लें कनेक्शन तोडलें. हाचो अर्थ हो बेकायदेशीर प्रकार आसा. हें कनेक्शन कोणे तोडलें, नळ कनेक्शन दिवपाक खंयच्या खात्यान रस्तो खणून कनेक्शन दिवपाक मजत केली हाची म्हायती लोकांक मेळपाक जाय अशें बर्डे हांणी सांगलें.
इतले दीस मीटर नास्तना उदकाचो वापर केलो. उदकाचे हे योरये आड आपूण राज्य वेंचणूक आयोग आनी हेर संबंदितां कडेन लेखी कागाळ करतलो. तशेंच आमदार म्हणून आर्लेकार हाका अपात्र थारावचें अशी मागणी करपी याचिका सभापतीक सादर करतलों अशें तांणी सांगलें. बिलां भरलीं ना जाल्यार साबार लोकांची कनेक्शनां कापतात. मात लोक प्रतिनिधीच्या बेकायदेशीरपणाकडेन आडनदर करपाचें हें एक उदाहरण आसा अशें बर्डे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
