भांगरभूंय | प्रतिनिधी
भांगरभूंय । प्रतिनिधी
पोरणे गोंयः जैव विविधताय वेवस्थापन समितीचो (बीएमसी) अध्यक्ष वेंचून काडपा विशीं वाद उप्राशिल्ल्यान सरपंचान आयतारा आपयल्ली कुडकाची ग्रामसभा अर्द्यार अकस्मता तहकूब केली. बीएमसी अध्यक्षपदा खातीर रिव्होल्युशनरी गोवन्सान तेंको दिल्लो व व पंचायतींतल्या सत्ताधारी पंगडाचो तेंको आशिल्लो अशे दोग जाणानी अर्ज सादर केल्ले. हात दाखोवन ही वेंचणूक करपाचे पंचायत सचीव केशव फडते हांणी जाहीर केलें आनी आरजी समर्थक उमेदवार तातूंत जैतिवंत जालो. मात ग्रामसभेक हाजीर आशिल्ल्याची हजेरी बुकांत सय केल्ले आनी दोनूय उमेदवारांक मेळिल्लो तेको हाचें गणित जुळना अशें सचिवान सांगतगीर वादाक सुरवात जाली.
ग्रासभेक हजर आशिल्ल्यांक हजेरी बुकांत सय करून परत वेंचणूक घेवपाचें सचिवान जाहीर केलें आनी सत्ताधारी पंगडाच्या उमेदवाराच्या समर्थकांनी पटापट सयो केल्यो आनी पयलीं सही केल्ल्यो ताचे परस चड सयांचो बुकांत नोंद जाली. परत मतदान घेतलें तेन्ना सत्ताधारी पंगडाच्या उमेदवाराक 134 मता मेळिल्ल्यान ताका जैतिवंत घोशीत केलें. आरजी समर्थक उमेदवाराक मेळिल्ली मतां वेचपाक सचिवान न्हयकार दिलो. आरजी समर्थक दिपाली आनी महानंद ह्या पंच वांगड्यांनी तशी मागणी करून लेगीत आरजी समर्थक उमेदवारांची मतां मेजलीं नात.
आरजी समर्थकांनी वेंचणुकेचो निकाल मानून घेवपाक न्हयकार दिवन बोवाळ घालपाक सुरवात केली. सान्त आंद्रेचो आमदार विरेश बोरकार हांणी हस्तक्षेप करून बोवाळ थांबोवपाचो यत्न केलो. मात आदलो उपसरपंच मार्विन गोन्साल्वीस हाणे आमदार बोरकार कुडकाचो मतदार नाशिल्ल्यान ताका ग्रामसभेंत उलोवपाचो अधिकार ना अशें सांगलें आनी वातावरण चडूच तापलें. बोवाळ थांबपाची चिन्हा दिसनात म्हणून सरपंच साधना गोन्साल्वीसान ग्रामसभा सोपल्ल्यांचें जाहीर केलें. हाचे आड बीडीओ आनी पंचायत खात्यान कागाळ करतले अशें दिपाली आनी महानंद हांणी पत्रकारांक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
