भांगरभूंय | प्रतिनिधी
भांगरभूंय । प्रतिनिधी
सांगेंः सांग्यार आयआयटी प्रकल्प उबारपा खातीर गोंय सरकारान वेंचून काडिल्ली सुवात दोंगराळ आशिल्ल्यान ती केंद्र सरकारान न्हयकारल्ल्यान प्रकल्प वाठारांतले शेतकार तशेंच सैम मोग्यांनी खोशी उक्तायल्या. मात हे संबंदी लेखी कळयनात तो मेरेन आंदोलन चालू दवोरपाचो पवित्रो सांगे बचाव समितीन घेतला.
सांग्यार आयआयटी शिक्षणीक प्रकल्प उबारपाक विरोध करपा खातीर सांगें बचाव समितीचें फाटल्या 62 दिसां सावन दांडो- सांगें हांका धरणे आंदोलन सुरू आसा. आयआयटी प्रकल्पा खातीर गोंय सरकारान सांग्यार जी जमीन वेंचून काडल्या ती केंद्र सरकारान न्हयकारल्या तरी सांग्याचो आमदार आनी समाज कल्याण मंत्री सुभाष फळदेसाय आयआयटी सांग्यारूच जातली अशें सांगतात. ते खातीर तीन लाख चौखण मीटर सोदून काडपाचे यत्न तांणी सुरू केल्यात.
आयआयटी खातीर गोंय सरकारान दिवपाक केल्ली जमीन केंद्र सरकारान न्हयकारल्या हाचे वयल्यान केंद्र सरकाराक सैमा विशीं हुस्को आसा हें दिसून आयलां अशें मिल्टन फर्नांडीस हांणे पत्रकारां कडेन उलयतना सांगलें. दोंगराळ जमीन केंद्रान आमकां नाका अशें सांगलां. उरल्ली तीन लाख चौखण मीटर शेत जमीन आसा. आतां गोंय सरकारान ती शेतकारांक कसपा खातीर दिवची. जमीन न्हयकारून केंद्र सरकारान लोकांची दिकाभूल करपी सुभाष फळदेसाय हांका धडो शिकयला, अशें मिल्टन हांणी सांगलें.
मळकर्णे हांगा जाल्ले जल ही जीवन है कार्यावळींत उलयतना उदकास्रोत मंत्री सुभाष शिरोडकार हांणी सांगेकारांक आयआयटी नाक जाल्यार ती शिरोड्या व्हरपाची तयारी दाखयल्ली तेन्ना सुभाष फळदेसाय हाचें तोंड सामकें पडिल्लें. आतां तरी शाणो जावंन ताणे सांग्यार आयआयटी हाडपाचें सपन पळोवचें न्हय अशें संजय मापारी हाणे सांगले.
आयआयटी सांग्या वयल्यान दुसरे कडेन व्हर मेरेन आमचें आंदोलन चालू आसतलें अशें सांगें बचाव समितीचो फुडारी जोजफ फर्नांडीस हाणे जाहीर केलां. सांग्यार आयआयटी हाडपाक आमचो संदाच विरोध आसतलो. ही लडाय फकत शेतकारांची न्हय जाल्यार सैम मोगी पुराय सांगेकारांची आसा अशें तांणे सांगलें.
मॅश्यूक धाडिल्ली नोटीस फाटीं घेवची
मजगती, सांगे पालिका मंडळाचो नगरसेवक मॅश्यू डिकॉस्ता हाका धाडिल्ली तडीपार करपाची नोटीस बेगोबेग फाटीं घेवपाची मागणी सांग्यार जावपी आयआयटीक विरोध करपी सांगें बचाव समितीन केल्या. समितीन दांडो हांगा एक पत्रकार परिशद घेवन ही मागणी केल्या.
सांग्यांतलो सैम राखून दवोरपा खातीर आयआयटी प्रकल्पाक विरोध करून लोकां मदीं ते खातीर जाग्रुताय करपी मॅश्यू डिकॉस्ताक तडीपार करून सरकार ताचेर राजकी सूड घेवपास सोदता, असो आरोप सान्तान रॉड्रिग्ज हांणी केला. लोकां खातीर वापुरपी मॅश्यूक तडीपार करपाची तयारी सरकारान चलयल्या. कोणाचें तरी चेंपण आयिल्ल्यान दक्षीण गोंय जिल्होधिकाऱ्यान तडीपार करपाची नोटीश धाडल्या. ताची चवकशी करून ही नोटीस फाटीं घेवपाची मागणी तांणी केली.
मॅश्यूक धाडिल्ली नोटीस म्हणल्यार लोकशायेचो खून अशें जोजेफ फर्नांडीस हाणे सांगलें. लोकांक त्रास करपी गुन्यांवकारी प्रवृत्तीच्या लोकांक तडीपार करपाची गरज आसतना लोकांच्या बऱ्या खातीर वावुरपी मॅश्यू सारक्याक तडीपार करपाचो यत्न करप म्हणल्यार चोराक सोडून संन्याश्याक सुळार चडोपाचो व्हो प्रकार आसा अशें मिल्टन फर्नांडीस हांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
