भांगरभूंय | प्रतिनिधी
भांगरभूंय । प्रतिनिधी
पेडणें: आगरवाडो चोपडें पंचायत वाठारांतल्या चोपडें शिवोली पुला लागसार जोडरस्तो आसा. थंय रस्तो रुंदीरकरणा खातीर सरकारान जमीन संपादीत केल्ली आनी ती भौशीक बांदकाम खात्याच्या रस्तो विभागा कडेन दिल्ली. हेच सरकारी जमनींत अतिक्रमण करून बांदकाम करपाचो प्रकार फाटल्या कितल्याशाच म्हयन्यां सावन चालू आसा.
राखणे वण्टीचेरूच चलिल्ल्या बांदकामांचेर थळावी पंचायत आनी भौशीक बांदकाम खात्याच्या रस्तो विभागाची पुराय आडनदर जाल्या. ताका लागून खूबशा सरकारी जमनींत अतिक्रमणां चालू आसात. तांचेर खर कारवाय करची, अशी मागणी थळाव्या लोकांनी केल्या.
चोपडें- शिवोली पुलाच्या जोड रस्त्याचे कुशीक एका मनशान सरकारी जमनींत अतिक्रमण करून बांदकाम केलां. थळाव्या लोकांनी हे संबंदांत पंचायतीक कळयिल्लें, पूण रस्तो विभागान ताचे कडेन पुराय आडनदर केल्या, अशें थळाव्या लोकांचें म्हणणें आसा. मजगतीं, मांद्रें मतदारसंघांतल्या मुख्य रस्त्या कुशीची सुवात सरकारान संपादीत केल्या. पूण ती राखून दवरचे खातीर चडशे कडेन राखणे वणट उबारूंक ना. ताका लागून खूबशा वाठारांनी ते जमनींत अतिक्रमण करून गाडे, घरां बांदल्यांत. ताचे कडेन थळावे पंचायतीन तशेंच रस्तो विभागान पुराय आडनदर केल्या. रस्त्या कुशीच्या गाड्यांक लागून खूबशे गिरायक आपल्यो गाडयो रस्त्याचेरूच दवरून त्या गाड्यांचेर वतात. ताका लागून आदींच अशीर आशिल्ल्या रस्त्याचेर कोंयडी जाता. ह्या प्रकाराचेर सरकारान ताकतिकेन उपाय येवजण करची, अशी मागणी गजानन शेट्ये हांणी केल्या.
निवेदन दियात, कारवाय करताः आरोलकार
सरकारी जमनींत कोणेंय अतिक्रण केलां आसत जाल्यार तशें लेखी निवेदन आपल्याक दिवचें. आपूण ताकतिकेन फुडली कार्यवाही करून योग्य ती कारवाय करता, अशें आमदार जीत आरोलकार हांणी प्रतिनिधी कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
