भांगरभूंय | प्रतिनिधी
खबरां संस्था
मावंट मौनगानुयः दुसरे टी-20 मॅचींत भारतान न्यूझिलंडाचेर 65 धांवड्यांनी दणदणीत जैत मेळयलें. सूर्यकुमार यादव ह्या जैताचो शिल्पकार तशेंच मॅन ऑफ दी मॅच थारलो. भारतान हे टी-20 माळेंत 1-0 अशी आघाडी घेतल्या. भारतीय बॅट्समनानीं न्यूझिलंडाच्या बॉलरांक सामको घाम काडलो. सूर्यकुमार यादवान विस्फोटक खेळी करून भारताक व्हडली धांवसंख्या उबारून दिली. तिचो फाटलाव करतना न्यूझीलंड 18.5 ओव्हरींत फकत 126 धांवड्यो करपाक शकलो.
भारतान न्यूझिलंडा सामकार 192 धांवड्यांचें लक्ष्य दवोरिल्ले. न्यूझिलंडाच्या कॅप्टटान टॉस जिखून भारताक पयलीं खेळपाक सांगलें. भारताची सुरवात तशी बरी नाशिल्ली. ईशान किशन आनी ऋषभ पंतान भारताच्या डावाची सुरवात केली. पंत 13 बॉलांत 6 धांवड्यो करून आवट जालो. भराताच्यो तेन्ना 36 धांवड्यो जाल्ल्यो. ईशानान धांवड्यांची गती वाडोवन पंगडाचो अर्द शेंकडो पुराय केलो आनी 31 बॉलांत 36 धांवड्यो करून तो पॅव्हेलियनात आयलो.
पावसाक लागून 27 मिनटांचो खेळ फुकट गेलो. मात ओव्हरीचे संख्येचेर कसलोच परिणाम जालो ना. सूर्यकुमारान एक बाजू लावन धरली आनी दुसरे वटेन विकेटी पडत रावल्यो. श्रेयस अय्यर 9 बॉलांत 13 धांवड्यो करून आवट जालो. कॅप्टन हार्दिक पंड्यान 13 बॉलांत फकत 13 धांवड्यो करपाक शकलो. ते उपरांत आयिल्ल्या दीपक हुडा आनी वॉशिंग्टन सुंदराक खातेंय उगडपाक मेळ्ळें ना. निमाणे सूर्यकुमार यादवान 51 बॉलांत 111 धांवड्यांची वादळी खेळी करून तो नाबार रावलो. ताणे 11 चौके आनी 7 सके मारले. ताचे हे खेळीक लागून भारताच्या नांवार 6 बाद 191 धांवड्यो लागल्यो. टीम सावदीन 34 धांवड्यांत 3, फर्गुसनान 49 धांवड्यांत 2 विकेटी घेतल्यो. सोदीक एक विकेट मेळ्ळी.
भारताच्या बॉलरां सामकार न्यूझिलंडाच्या बॅट्समनांचें कांय एक चल्लें ना. कॅप्टन केन विलियमसन, डेव्हन कॉनवे सोडून तांचे हेर बॅट्समन चड वेळ तिगपाक शकले ना. विलियमसनाकची विकेट मोहम्मद सिराजान घेतली मात ताचे पयलीं ताणे 52 बॉलांत 4 चौके आनी 2 सक्यांनी 61 धांवड्यो केल्यो. कॉनवे 22 बॉलांत 25 धांवड्यो केल्यो. ग्लॅन फिलीप (12), डॅरील मिचेल (10) हे सोडले जाल्यार हेर बॅट्समन दोन अंकी धांवड्यो करपाक शकले नात. दीपक हुडा न्यूझिलंडाचो कर्दनकाळ थारलो तांणे फकत 10 धांवड्यो दिवंन 4 विकेटी घेतल्यो. भुवनेश्वर कुमारान फीन अॅलनाक शून्याचेर आवट करून न्यूझिलंडाची स्थिती 1 बाद 0 अशी केली. मोहम्मद सिराज (2-24), युजवेंद्र चहल (2-26) आनी वॉशिंग्टन सुंदरान दीपक हुडाक बरो वांगोड दिल्ल्यान न्यूझिलंडाक तांणी 126 धांवड्यांत बाद करून पंगडाक 65 धांवड्यांनी जैतिवंत केलें.
टी-20 वर्ल्ड कपाचे सेमी फायनलींत भारत आनी न्यूझिलंडाक हार खावची पडिल्ली. तें विसरून दोनूय पंगडांक नव्यान सुरवात करपाची आसा. भारतीय पंगडाचें फुडारपण करपाची जापसालदारी हार्दिक पंड्याचेर आसा. 2024 वर्साच्या टी-20 वर्ल्ड कपा खातीर हो बदल म्हत्वाचो मानतात.
सूर्यान बाबराक फाटीं उडयलें.
दुसरे टी-20 मॅचीच सूर्यकुमारान 51 बॉलांत 217.65च्या स्ट्रायक रेटान 111 धांवड्यो केल्यो. एका कॅलेंडर वर्सांत दोन शेकडें करपी तो पयलो भारतीय बॅट्समन थारला. ताणे कॅलेंडर वर्सांत 11 फावट टी-20 आंतरराष्ट्रीय मॅचींत 50 परस चड धांवड्यो करून पाकिस्तानाच्या बाबर आझमाक फाटीं उडयलां आनी तो मोहम्मद रिझवानाच्या लागीं पावला. रिझवानान 2021 च्या कॅलेंडर वर्सांत आंतरराष्ट्रीय टी-20क सगळ्यांत चड 13 फावट 50 परस चड धांवड्यो केल्यात. टी-20चे बॅटिंगेचे क्रमवारींत सूर्यकुमार पयले आनी रिझवान दुसरे सुवातेर आसा.
रोहीताच्या विक्रमा कडेन बोरोबोरी
सूर्यकुमारान 2022च्या आंतरराष्ट्रीय टी-20त 1100 धांवड्यो पुराय केल्यात. संवसारांतल्या हेर खंयच्याय बॅट्समनाक 1000 धांवड्योप पुराय करपाक मेळ्ळें ना. सूर्याचे 2022च्या आंतरराष्ट्रीय टी-20तलें हो दुसरो शेंकडो. अशे तरेन ताणे रोहीत शर्माच्या विक्रमा कडेन बोरोबोरी केल्या 2018 वर्सा रोहितान टी-20त एक वर्सांत दोन शेंकडे केल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
