भांगरभूंय | प्रतिनिधी
बाबुराव नायकः सांवड्डें ट्रक धनयांचें जाहीर बसकेंत उलो
भांगरभूंय । प्रतिनिधी
सांगें: फाटलीं धा वर्सां खण वेवसाय बंद आसा. अर्थीक स्थिती सुमाराची जाल्ल्यान आतां येरादारी खात्यान विवीध तरांचे कर आनी दंड लागू केल्यात. ताका लागून ट्रक वेवसाय परतून उबो रावपाक कठीण जातलें. हे खातीर सगळ्या ट्रक धनयांनी राजकारण कुशीक दवरून ट्रक धनयांच्या हिता खातीर एकवटीत जावचे, असो उलो ट्रक धनी संघटणेचे अध्यक्ष बाबुराव नायक हांणी मारलो.
तिस्क सांवड्ड्यां ट्रक धनयांची जाहीर बसकेंत नायक उलयताले. ह्या वेळार तांच्या वांगडा माचयेर सत्यवान गांवकार, लक्ष्मण देसाय, ब्रुनो डिसोझा, केशव नायक, प्रदीप पाऊसकार, मनोज नायक आनी हेर मानेस्त हाजीर आशिल्ले.
येरादारी खात्यान हरीत कर आनी ट्रकाचें फिटनेस मेळोवपा खातीर वेळ जाल्यार दर दिसा 50 रुपया दंड जाहीर केला. वेव्हार ना, उरफाटे ट्रक दवरल्यात थंय कळमेल्यात. ट्रक धनयांनी आतां एकठांय येवन आवाज काडिना जाल्यार फुडारांत ट्रक धनयांचो विशय मुखार वच्चो ना, अशी शिटकावणी नायक हांणी दिली.
आमी मुख्यमंत्री डॉ. प्रमोद सावंत हांकां मेळून ट्रक धनयांचे कश्ट मांडले. ह्या विशयाचेर आपूण उपाय काडटलो, असो भरवसो तांणी त्या वेळार ट्रक धनयांक दिला. दोन दीस वाट पळयले उपरांत आमी फुडलो निर्णय घेतले, अशें नायक हांणी ह्या वेळार स्पश्ट केलें. रवींद्र आवदियेकार हांणी सांगलें, ट्रक धनयांक सगळेच्यो सवलती जाय, पूण फुडार घेवप्या फाटल्यान ट्रक धनी उबे रावनात. हे खातीर ट्रक धनयां मदीं एकी ना, अशें चित्र निर्माण जालां, अशी खंत तांणी उक्तायली. ट्रक धनयांच्यो वेगवेगळ्यो संघटणा आसल्यो तरी सगळ्यांचो विशय एकूच आसा. हाची जाणीव दवरून ह्या मुद्द्याचेर सगळ्यांनी एकठांय येवचें, असोय तांणी उलो मारलो.
होच योग्य वेळः बसकेंत सूर
दक्षीण गोंयांतले 14 हजार ट्रक सरकार दरबारांत नोंद आसात. त्या सगळ्याच ट्रक धनयां मुखार आयज अर्थीक संकट उबें रावलां. विवीध संकटांक फुडो करून ट्रक धनी जियेतात. आयज ना फाल्यां सरकार न्याय दितलें, हे आशेन आमी आयज मेरेन रावले. पूण आतां सगळ्यांनी एकठांय येवन आवाज काडपाचो होच योग्य वेळ आसा, अशें मत ट्रक धनयांचे बसकेंत साबार उलोवप्यांनी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
