भांगरभूंय | प्रतिनिधी
विश्व कोंकणी सरदार बस्ती वामन शणै हांचो पूत बस्ती दिनेश शणै हांणी स्वता बरोवन निर्माण केल्लो कन्नड सिनेमा ‘मध्यांतर’ अंदूं 53 व्या आंतरराष्ट्रीय चित्रपट महोत्सवांत इंडियन पॅनोरमा विभागांत प्रदर्शीत जातलो. अंदूं इफ्फी महोत्सव 20 ते 28 नोव्हेंबर मजगतीं पणजे शारांत जातलो.
बस्ती दिनेश शणै फाटलीं पंचवीस वर्सां छायाचित्रकार, निर्मातो आनी दिग्दर्शकाचे भुमिकेंत भारतीय सिनेक्षेत्रांत सक्रिय आसात. तांचो मूळ गांव जरी मंगळुरा लागसार बंटवाल आसलो तरी ते सिने निर्मितीच्या कामा पासत दिल्लीक राबितो करून आसतात.
‘मध्यांतर’ हो सिनेमा सादारण 1970 ते 1980 ह्या दशकांतल्या काळांतलो आसा. आयज तंत्रगिन्यान खूब मुखार पावलां. नवे नवे तरेचे आनी मोदीचे डिजिटल कॅमेरा आयल्यात. चित्रीकरण खूब सोंपे पद्दतीन करप शक्य जालां. पूण दिनेशान त्या काळार वापरताले ते सिने जगतांतले 16 एम. एम. सेल्युलॉयड कॅमेरा वापरून ह्या सिनेमाचें चित्रीकरण केलां. ताच्या मतान ह्या कॅमेराचेर जितलें सुस्पश्ट आनी बरें चित्रिकरण जाता तितले उंचायेचो पांवडो आयचे आधुनीक कॅमेरा वापरून लेगीत एक एकदा जायना. आनी ह्या सिनेमाची कथा सिनेमा क्षेत्रांत फुडार घडोवपाचें सपन पळोवपी तरनाट्यांच्या जिविताचेर आदारीत आशिल्ल्यान दिनेशान सेल्युलॉयड कॅमेरा वापरून कथेक न्याय दिवपाचो प्रामाणीक प्रयत्न केला.
कर्नाटकांतल्या एका ल्हानशा गांवांतल्या हॉटेलांत वेटराचें काम करपी दोन भुरग्यांचे जिणेचेर ही कथा. हे दोगूय भुरगे दिसभर हें कश्टाचें काम करतनाच सिनेमा क्षेत्रांत वचपाचीं सपनां पळयतात. थेटरांत लागपी नवो सिनेमा पळोवपाक श्रमान जोडिल्ले पयशे सोंपयतात. उपरांत सिनेक्षेत्रांत सादे टॅक्निशियन म्हणून रिगतात आनी कश्ट आनी सादनेच्या बळार दिग्दर्शक म्हणून नामनेक पावतात. तांची ही संघर्शमय कथा.
निर्मातो दिनेश शणै हे काणयेंतल्यान घडये आपलीच काणी सांगपाचो यत्न करतात. अर्दे सत्य अर्दी काल्पनीक अशी ही कथा. पूण स्फूर्त दिवपी कथा. ह्या सिनेमांतलीं मुखेल पात्रां थारायतना तांणी चिकमंगळूरांत तांच्या एका सोयर्याच्या हॉटेलांत काम करपी दोन वेटरांक मध्यवर्ती स्थान दिलें.
फाटलीं पंचवीस वर्सां ते सिनेमा क्षेत्रांत वावुरतात. आयज दिग्दर्शन आनी छायाचित्रणाच्या मळार तांणी नांव जोडलां. तरी हांगा मेरेन पावपा खातीर तांकां खूब कश्ट सहन करचे पडल्यात. सोंपेपणी यश मेळूंक ना. 1975 ते 1986 ह्या काळांत बंटवाल, चिकमंगळूर, शिमोगा ह्या गांवांनी तांचें भुरगेपण गेलें. त्या काळार खूब उण्या प्रमाणांत गांवांनी सिनेमाचीं थेटरां आसतालीं. सिनेमा आनी सिनेनटा बद्दल खूब आकर्शण आसतालें. दिनेशूय ताका आडवाद नासले. तांकांय सिनेमा विशीं आनी व्हडल्या पड्ड्या विशीं ओड आसली. आवडट्या नटाक पळोवपा खातीर एक एक सिनेमा खूब फावटीं लेगीत पळयताले. शिक्षण सोंपतकीर तांणी अफाट श्रम करून सिनेक्षेत्रांत नांव जोडलें. हें कथानक चालू आसतना फाटलो काळ समर्थपणान तांणी उबी केला.
बस्ती दिनेश शणै हे एक अणभवी दिग्दर्शक. तांणी आशुतोष गोवारीकर, आमिर खान, एड्रियन ब्रोडी, वेस एंडरसन, मोहसेन मोखमालबाफ सारक्या नामनेच्या दिग्दर्शक आनी कलाकारां बरोबर काम केलां. ‘मध्यांतर’ ह्या कन्नड सिनेमांत वीर आनी अजय निनासम, रमेश पंडित तशेंच राजकुमार श्रीनिवासन हांच्यो भुमिका आसात. सिद्धांत माथुर हांणी संगीत नियोजन केलां जाल्यार सुनिल बोरकार हांणी छायाचित्रण केलां. फिल्माचें प्रॉडक्शन डिजायनर शशीधर अडाप्पा आनी सुरेश अर्स हांणी संकलन केलां. मूळ गोंयकार जावन आशिल्ल्या आमच्या मंगळुरी कोंकणी दिग्दर्शकान निर्माण केल्लो हो सिनेमा इंडियन पॅनोरमान दाखोवपा खातीर वेंचून काडला. फुडाराक कोंकणी सिनेमा खातीर दिनेश शणै हांचे कडसून भरीव वावर जातलो अशी आस्त आमी बाळगुया.
उदय नरसिंह म्हांबरो
9420766769
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
