भांगरभूंय | प्रतिनिधी
दीस कशे वतात, ते कळनात. दिसा फाटोफाट म्हयने वतात आनी म्हयन्या फाटोफाट वर्सां वतात. फाटीं उरतात त्यो फकत यादीं. चित्रपट महोत्सवा विशीं सुद्दा अशेंच म्हणपाक येता. हांवें गोंयांत जाल्ले आयज मेरेनचे सगळे महोत्सव पळयल्यात. चडशा उक्तावण तशेंच समारोप सुवाळ्याचें वार्तांकन केलां. सर्गेस्त देव आनंद, अनिल कपुर, मधुर भंडारकर हांचे सारख्या दिग्गजांच्या पत्रकार परिशदांक हाजेरी लायल्या. पयली दोन, तीन वर्सां चित्रपट महोत्सवाचें बरेंच अप्रूप आशिल्लें. उक्तावण तशेंच समारोपाच्या सुवाळ्याच्या निमंत्रणा खातीर गर्दी जाताली. निमंत्रणाचे पास मेळोवपाक कार्यकर्ते आमदार तशेच मंत्र्यांच्या घरा वताले. ल्हव ल्हव इफ्फीची क्रेज उणी जावपाक लागली. फाटल्या दोन इफ्फी वेळार कोरोना महामारी आशिल्ली. हाका लागून उपस्थिती सामकी उणी आशिल्ली. तरी लेगीत 2020 आनी 2021 ह्या दोनूय वर्सांचे महोत्सव जाले.
स्टार अभिनेते वा कलाकारांनी हाजेरी लायली जाल्यारूच इफ्फींत ग्लॅमर येता. प्रतिनिधी तशेच पत्रकारांची गर्दी जाता. तांकां पळोपा खातीर कला अकादमी भायर सुद्दा गर्दी जाता. तशेंच हेर खंयच्याय चित्रपटा परस हीट जाल्ल्या हिंदी चित्रपटाक चड गर्दी जाता. हेर भाशे परस हिंदी चित्रपटांक सगळयांत चड ग्लॅमर आसा. हाका लागून उक्तावण सुवाळ्याक हिंदी चित्रपटांतलो स्टार अभिनेतो वा अभिनेत्री आसप ही गरज जाल्या. गोंयांत 2004 वर्सा सावन इफ्फी सुरू जालो. पयल्या इफ्फीच्या उक्तावण सुवाळ्याक अभिनयाचो बादशाह सर्गेस्त दिलीप कुमार हाची मुखेल सोयरो ह्या नात्यान उपस्थिती आशिल्ली. हाचे उपरांत देव आनंद, शशी कपुर, रेखा, शाहरूख खान, अजय देवगण, अमिताभ बच्चन हांणी महोत्सवाच्या उक्तावणाक हाजेरी लायिल्ली.
इफ्फीच्या यादींचेर वा इतिहासाचेर नदर घाली जाल्यार सगळ्यांत पयलो म्हणजे 2004 सालांत जाल्ल्या महोत्सवाची याद जाता. हो इफ्फी जालो तेन्ना सर्गेस्त मनोहर पर्रीकार हे मुख्यमंत्री आशिल्ले. केंद्रांत मात भाजपाचें सरकार आशिल्लें. केंद्रांत जेन्ना वाजपेयींच्या फुडारपणा खाला भाजपाचें सरकार आशिल्लें तेन्नाच गोंयांत इफ्फी आयोजीत करपाक मान्यताय दिल्ली. तेन्नाचे केंद्रीय म्हायती आनी प्रसारण मंत्री रवीशंकर प्रसाद हांणी गोंयांत पत्रकार परिशद घेवन ही घोशणा केली. राज्यांत महोत्सवा खातीर परिशदघर, फावो ते तांकेचीं थिएटरां नात. हेर सुविधा नात. महोत्सव जातलो काय? अशे प्रस्न सगळे करताले.
इफ्फी येसस्वी करप हो तेन्नाचे मुख्यमंत्री मनोहर पर्रीकार हांचे खातीर प्रतिश्ठेचो विशय आशिल्लो. उण्या काळांत तांणी गोंय साधनसुविधा उदरगत म्हामंडळा वरवीं इफ्फीचीं सगळीं कामां केलीं. कला अकादमीची पयले फावट दुरुस्ती जाली. ब्लॅक बॉक्साचे रचणुकेंत बदल केलो. हे भायर आयनॉक्स थिएटराची उबारणी जाली. पोन्न्या वैजकी महाविद्यालय इमारतीची दुरुस्ती जाली. माकनिज पॅलेस इमारतीचो साज बदलून तांतुत मनरिजवण संस्थेची स्थापना जाली. समांतर पाटो पूल उबारपा सयत पणजेंतल्या रस्त्यांची दुरुस्ती जाली. हीं सगळीं कामां चार म्हयन्यांत पुराय जालीं. ह्या सगळ्या कामांक लागून पणजेचें रूप बदल्लें. ती नवे व्हंकले सारकी नटली आनी इफ्फीक सज्ज जाली.
चित्रपट महोत्सव म्हणजे किदें? हाची सामान्य गोंयकारांक कसलीच कल्पना नासली. हाका लागून इफ्फी विशीं सगळ्यांक उमळशीक आशिल्ली. आतां महोत्सव 8 दिसांचो जाता. सुरवेक तो 10 दिसांचो जातालो. 23 नोव्हेंबर ते 3 डिसेंबर ह्या काळांत महोत्सव जातालो. 3 डिसेंबराक फेस्त आसता. चित्रपट महोत्सव सोंपलो काय हेर राज्यांतले प्रतिनिधी फेस्ताक वताले. इफ्फी वेळार येरादारीची कोयंडी ही सदचीच गजाल आसताली. तेन्ना श्यामाप्रसाद मुखर्जी स्टेडियम नाशिल्लो. हाका लागून कला अकादमी हेंच महोत्सवाचें मुखेल थळ आशिल्लें. अकादमीच्या आर्ट गॅलरींत चित्रपटाच्या इतिहासाचेर आदारीत प्रदर्शन भरतालें. जे सुवातीचेर लोकोत्सव जाता, थंय फिल्म बाजार भरतालो. पयल्या महोत्सवांत कला अकादमीच्या ब्लॅक बॉक्सांत पत्रकार परिशदो जाताल्यो. मिरामार दर्यादेग, चिल्ड्रन्स पार्क, करंजाळे ह्या थळांचेर चित्रपट प्रदर्शना भायर संगिताच्यो कार्यावळी जाताल्यो. 2004 वर्सा दर दिसा सांजे वेळार मिरामार दर्यादेगेर मनरिजवणेची कार्यावळ जाताली. हाका लागून फेरीबोट ते मिरामार मेरेन गर्दी जाताली. येरादारीचे कोयंडेक लागून लोकांची गैरसोय जाताली.
पयल्या महोत्सवांत अनिल कपुर, दिग्दर्शक सुभाष घई, एन. चंद्रा, जॅकी श्रॉफ, जुही चावला, संजय दत्त, दिग्दर्शक संजय गुप्ता हांणी महोत्सवाक भेट दिल्ली. इफ्फीच्यो पार्ट्यो हो एक स्वतंत्र विशय आसा. कलाकार आनी वीआयपींचे उपस्थितीक लागून ह्या पार्ट्यांक एक वेगळेंच ग्लॅमर आसता. ह्यो पार्ट्यो पत्रकार आनी निमंत्रितां खातीर आसता. प्रतिनिधीं खातीर नासता. पयल्या महोत्सवांत दर दिसा राती पार्ट्यो जाल्यो. खोर्जुवे हांगा राज्यांतलो पयलो केबल स्टेड पूल जालो. त्या पुलाचेर महोत्सवांत पार्टी जाली. पयलो महोत्सव सगळेच बाबतींत यादगार थारलो. ह्या महोत्सवा उपरांत राज्यांत काँग्रेसीचें सरकार आयलें. राज्यांत आनी केंद्रांत काँग्रेसीचें सरकार अशी स्थिती निर्माण जाली. चित्रपट महोत्सव मात राज्यांत जायत रावलो.
तीन ते चार वर्सां उपरांत महोत्सव गोंय सावन हेर राज्यांत व्हरचो अशी मागणी जाली. महोत्सवाचो गोंयाक फावो तसो लाव जाय ना. तो कित्याक जाय? अशी चर्चा राज्यांत जावपाक लागली. ही मागणी तशेच चर्चा रोखडीच बंद जाली. पयल्या महोत्सवा उपरांत उक्तावण तशेच समारोपाच्या थळान बदल जायत रावलो. आयनॉक्स वाठारांत, कला अकादमी भायर खासा हँगर उबारून वा कांपाल मैदानाचेर इफ्फीचें उक्तावण जालां. आतां तें कायम स्वरुपी डॉ. श्यामाप्रसाद मुखर्जी स्टेडियमांत जाता.
अंदूं कोरोनाची भिरांत ना. 250 ते 300 चित्रपट पळोवपाची संद प्रतिनिधीक मेळटली. महोत्सवाच्या थळां भायर लेगीत चित्रपटांचें प्रदर्शन जातलें. अंदूं 7 हजरां वयर प्रतिनिधींची नोंदणी जाल्या. अंदूंचो महोत्सव सुद्धा ग्लॅमरस जातलो, अशी आस्त बाळगुपाक हरकत ना.
गणेश जावडेकार
9860610762
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
