भांगरभूंय | प्रतिनिधी
कतरांत संवसारीक फुटबॉल सर्त सुरू जावपाक कांय दीस आसतना पुर्तुगालाचो स्टार फुटबॉलर क्रिस्टियानो रोनाल्डोन वादग्रस्त मुलाखतींत सनसनाटी विधानां केल्लीं. मॅन्चॅस्टर युनायटेडाचो वेवस्थापक एरिक टेन हॅग हाच्या आड वादग्रस्त विधानां करून ताणें बोवाळ घालो. हाचे उपरांत मॅन्चॅस्टर युनायटेडान खर निर्णय घेवपाचें थारायलां. क्लब आतां रोनाल्डो कडली कबलात सोंपोवपाचो विचार करता.
ब्रिटीश पत्रकार मॉर्गनाक दिल्ले मुलाखतींत रोनाल्डोन मॅन्चॅस्टर युनायटेडाचो वेवस्थापक एरिका विशीं आपल्याक कसलोच आदर ना अशें म्हणिल्लें. तशेंच क्लबाचे अधिकारी ताका जबरदस्तीन मॅन्चॅस्टर युनायटेडांतल्यान भायर काडपाचो यत्न करतात असोय आरोप तांणी केल्लो.
रोनाल्डोच्या ह्या विधानां उपरांत मॅन्चॅस्टर युनायटेडान रोनाल्डो आड कारवाय करपाचे संकेत दिल्यात. रोनाल्डोचीं वक्तव्यां इंटरनॅटाचेर व्हायरल जायत आसतना क्लबान ताका प्रत्त्युत्तर दिलां, आतां सगले पुराव्या वरवीं सिद्ध जाल्या उपरांत हाचेर योग्य ती कारवाय करपाक सुरवात केल्या अशें क्लबान म्हणलां.
स्काय स्पोर्ट्सान दिल्ले खबरे प्रमाण मॅन्चॅस्टर युनायटेडाच्या तांबडे जर्सींत रोनाल्डो परतून एकदा खेळटना दिसपाची शक्यताय लागींलागीं सोंपल्या.
मॅन्चॅस्टर युनायटेडान रोनाल्डोचेर कारवाय करपा खातीर कसलीच कालमर्यादा दिवंक ना. पूण, रोनाल्डोची अॅक्झीट ही वेवस्थीत, सन्मानजनक आनी बेगीन करपाची आसा. तांकां रोनाल्डोक क्लब सोडपा खातीर कसलेच पयशे दिवपाची इत्सा ना. पूण, रोनाल्डो कडली कबलात इतिहासांतली सगल्यांत व्हड कबलांतली एक आसा. ताका लागून ही गजाल दिसता तितली सोंपी ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
