भांगरभूंय | प्रतिनिधी
56 गांव अतिसंवेदनशील वाठारांत; लोकांचे जिणेचेर येतली मर्यादा
भांगरभूंय । प्रतिनिधी
वाळपयः सत्तरी म्हालाचेर म्हादय अभयारण्याची तरसाद हुमकळटा. आतां सत्तरी म्हालांतल्या 56 गांवांचो अतिसंवेदनशील वाठारांत आस्पाव करपाचे यत्न चल्ल्यात. ताका लागून सत्तरी म्हालांतल्या लोकांमदीं भिरांतीचें वातावरण निर्माण जालां.
अभयारण्याची अधिसुचोवणी रद्द करून ह्या वाठारांतल्या लोकांक थाकाय दिवची, अशी मागणी फाटल्या 22 वर्सां सवन सत्तरीकार करतात. मात हे संबंदांत अजून कसलोच निर्णय घेवंक ना. आतां ह्या म्हालांतल्या 56 गांवांचो अतिसंवेदनशील वाठारांत आस्पाव करचो न्हय, अशी मागणी ह्या वाठारांतल्या लोकांनी केल्या.
मेळिल्ले म्हायती प्रमाण 1999 त सत्तरी म्हालांतल्या साबार गांवांचो आस्पाव करून म्हादय अभयारण्याची अधिसुचोवणी जारी केल्या. त्या वेळार थळाव्या लोकांक मातूय विस्वासांत घेवंक ना. ताका लागून फाटल्या 22 वर्सां सावन त्या वाठारांतले लोक संकटाचे फाटभुंयेर दीस काडटात. ही अधिसुचोवणी रद्द करची वा ह्या अभयारण्य वाठारांत आस्पावीत केल्ल्य लागवडी खालच्यो जमनी, देवस्थानां, लोकवस्ती वगळची, अशी मागणी ह्या वाठारांतले लोक नेमान करतात.
गोंयांत वट्ट 99 गांवांचो आस्पाव अतिसंवेदनशील वाठारांत करपाचे यत्न चल्ल्यात. तातूंत सांगें म्हालांतल्या साबार गांवांचो आस्पाव आसा. ताका लागून सांगें वाठारांतल्या लोकांनी आक्रमक भुमिका घेवन त्या गांवांचो आस्पाव अतिसंवेदनशील वाठारांत केलो जाल्यार खर परिणाम भोगचे पडटले, अशी शिटकावणी दिल्या. मात, सध्यातरी सत्तरी म्हालांत सामसूम दिसली तरी परतून केन्ना आनीक एकदां आंदोलन पेट घेत सांगपाक जावचें ना.
त्या 56 गांवांचो अतिसंवेदनशील वाठारांत आस्पाव केलो जाल्यार उदरगतीच्या प्रकल्पांचेर मर्यादा येतली. तशेंच लोकांचे जिणेचेरूय मर्यादा येवपाक शकतात.
मजगतीं, थळावे आमदार तशेंच मंत्री विश्वजीत राणे हांणी गोंयांतल्या 99 गांवांचो अतिसंवेदनशील वाठारांत आस्पाव करपाचो यत्न कशेच सोंसून घेवचे नात, अशी शिटकावणी दिल्या. हे संबंदांत आपणें केंद्रीय रान मंत्र्यां कडेन संपर्क केला. हे संबंदांतले कागदपत्रांचें सोपस्कार रोखडेच सुरू करतले अशी तांणी म्हायती दिल्या. मुख्यमंत्री डॉ. प्रमोद सावंत हांणीय हे संबंदांत गोंयांतल्या लोकांचेर अतिसंवेदनशील वाठाराचो परिणाम जावचो ना, अशें स्पश्ट केलां. मात अजीन मेरेन कागदपत्रांचें सोपस्कार पुराय करूंक नात. ताका लागून जर हे संबंदांतली अंतीम अधिसुचोवणी जारी केली जाल्यार सत्तरी म्हालांतल्या लोकां मुखार व्हड समस्या निर्माण जावपाक शकता.
सत्तरीकार करतले खर विरोधः हरिश्चंद्र गांवस
अभयारण्याची अधिसुचोवणी रद्द करचे खातीर फाटल्या 20 वर्सां सावन आमी संघर्श करतात. आतां परतून एकदां अतिसंवेदनशील वाठार आमचेर थापपाचो यत्न केलो जाल्यार ताका सत्तरीकार खर विरोध करतले. ह्या संबंदांत थळावे आमदार विश्वजीत राणे हांणी घेतिल्ल्या निर्णयाक येवकार. पूण तांणी हे संबंदांत सरकारा वतीन गांभिर्यान पावलां उखलचीं, अशी मागणी सत्तरी भुमिपुत्र संघटणेचे अध्यक्ष हरिश्चंद्र गांवस हांणी प्रतिनिधी कडेन उलयतना केली.
अतिसंवेदनशील वाठारांतले संभावीत गांव
अंजुणें, शिरोली, गुळें, भायलोवाडो, पाली, शिंगणे, हिवरे बुद्रूक, झर्मे, नानेली, माळोली, कोपाड्डें, ब्रह्मकरमळी, हेदोडें, आंबेडे, दोंगरवाडो, म्हावूस, भुंयपाल, बोंबेडे, वेळूस, सोनाळ, कुमारखण, वाळपय, सांवड्डें, वेळगें, असोळें, करमळी बुद्रूक, बाराजण, पणशें, शेळपी खूर्द, भिरोंडें, शिरसोडें, करंझोळ, आसोडें, मेळावली, गोतीखाडीलवाडो, आंबेली, गवाणे, मलपण, सुर्ल, साट्रे, गोळावली, चरावणे, हिरवे खूर्द, हिवरे बुद्रूक, केळावडे, रिवे, कोदाळ, डोंगुरवाडो, देरोडें, वायंगणी, नानोडें, झाडांनी आनी पेड्राल.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
