भांगरभूंय | प्रतिनिधी
दक्षीण गोंय जिल्होधिकाऱ्यान केली नोटीस जारी; समर्थक खुबळ्ळे
भांगरभूंय । प्रतिनिधी
सांगें: सांगेंचे नगरसेवक मॅश्यू डिकॉस्टा हांकां दक्षीण गोंय जिल्होधिकारी हांणी तडीपार नोटीस जारी केल्ल्यान सांगेंचे लोक चाळवल्यात. मॅश्यू डिकॉस्टा फक्त आपल्या वॉर्डाची न्हय जाल्यार पुराय मतदारसंघाचीं कामां करता. हेच खातीर लोकांनी ताका वेंचून हाडला. लोकां कडेन ताची बरी वागणूक आसतनाय तांकां जिल्होधिकारी तडीपार नोटीस कशी जारी करपाक शकता, असो प्रस्न ताच्या समर्थकांनी पत्रकार परिशदेंत विचारलो.
ह्या वेळार ओलिवर फर्नांडीस, फिलीप फुर्तादो, डॉली फर्नांडीस, माला फर्नांडीस, शावियर सिक्वेरा, काजमिरा डायस, पामेला डिसोझा, अनाक्लेत डिकॉस्टा, जोजफ फर्नांडीस आनी शंबरा वयर समर्थ हाजीर आशिल्ले.
ऑलिवर फर्नांडीस हांणी सांगलें, जिल्होधिकाऱ्यान जी नोटीस जारी केल्या ताचेर खोलायेन विचार करचो. तडीपार म्हणल्यार कितें? खंयच्या कारणा खातीर तांकां तडीपार केला? ताणें कोणाचो खून केला, बलात्कार केला काय दरोडो घातला, हें पयलीं सोदून काडचें. जांणी ही नोटीस जारी केल्या, तांणी सांगेंच्या लोकांचो अपमान केला. जिल्होधिकाऱ्यान हाचेर बारीक अभ्यास करून तांकां न्याय दिवचो.
फिलीप फुर्तादो हांणी सांगलें, जिल्होधिकाऱ्यान कायद्यांत आसा तेंच करपाक जाय. मॅश्यू सारक्या मनशाक तडीपार नोटीस जारी करून लोकशायेचो खून केला. ही नोटीस जारी करपा फाटल्यान राजकारण आसा. मॅश्यू एकटो ना, ताच्या फाटल्यान आमी सगळे आसात.
डॉली फर्नांडीस हांणी सांगलें, सांग्यार लोकशाय काबार जाल्या. आयआयटी, घर पटी, भुरग्यांची बाग ह्या प्रकरणांतल्यान ताका कुशीक दवरचे खातीर हो यत्न चल्ला.
माला फर्नांडीस हांणी सांगलें, आमी ताका वेंचून हाडला. ताचेर जाल्लो अन्याय आमी सोंसून घेवचे नात. वेळ आयल्यार मोर्चो काडपाक, आंदोलन करपाक आमी फाटीं रावचीं नात.
तडीपार नोटीस फक्त चेपणा खाला जारी केल्या. हाच्या फाटल्या सुत्रधाराक आमी सोडचे नात, अशें जोजफ फर्नांडीस हांणी सांगलें. अनाक्लेत डिकॉटा, काजमिरा डायस, पामेला डिसोझा हांणी ह्या वेळार मॅश्यू हाका तेंको दिवपाचें उतर दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
