भांगरभूंय | प्रतिनिधी
पंचायत मंडळाची उदका पुरवण विभागांत धांव
भांगरभूंयः प्रतिनिधी
म्हापशें: हणजूणें- कायसूव पंचायतींतल्या झरवाडो, वागातोर, टिटो आनी ग्रॅण्ड पेडे वाठारांत पियेवपाच्या उदकाची गंभीर समस्या निर्माण जाल्या. नळाक उदक येना ते भायर उदका पुरवण विभागान टँकर सेवा बंद केल्ल्यान हे समस्येंत आनीक भर पडल्या, अशें म्हणणें हणजूणें पंचायत मंडळान अभियंत्या मुखार मांडलें.
उपसरपंच अॅग्नेस कार्व्हालो, पंच सुरेंद्र गोवेकार, दिनेश पाटील, सुदेश पार्सेकार तशेंच आदले पंच संदेश खोर्जुवेंकार हांणी म्हापशेंच्या भौशीक बांदकाम खात्याच्या उदका पुरवण विभागाक शुक्रारा दनपारां भेट दिली आनी कनिश्ठ अभियंते तनय कांदोळकार हांचे कडेन समस्या मांडली.
फाटले दोन म्हयने पंचायतींतल्या कांय वाठारांनी नेमान उदक मेळना. तशेंच आतां ह्या विभागान टँकर सेवा लेगीत बंद केल्या. उदका खातीर लोक आमकां जाब विचारतात. खाजगी टँकर मागोवन लोकांची गैरसोय पयस करपाचो यत्न करतात. पूण दर दिसा टँकर दिवप शक्य जायना. ताका लागून नळांतल्यान फावोशी उदका पुरवण जाय मेरेन टँकारांतल्यान उदका पुरवण करपाची वेवस्था करात, अशी मागणी ह्या शिश्टमंडळान केली.
तिळारी धरणाच्या खारजाच्या दुरुस्तीकामाक लागून ह्या खारजांतल्यान येवपी उदक बंद केलां. ताका लागून अस्नोडें उदका शुद्धीकरण प्रकल्पांतल्यान बार्देस म्हालांतल्या टांकयांनी फावोशें उदक येना. हाका लागून उदकाची समस्या निर्माण जाल्या. ह्या खारजांतलें उदक 10 डिसेंबरा उपरांतूच सोडपाची शक्यताय आसा. ते भायर चार दिसां आदीं उदका पुरवण करपी टँकर सेवेचें कंत्राट सोंपलां. फुडल्या कांय दिसांनी ही सेवा आदले वरी चालू जातली, अशें स्पश्टीकरण कनिश्ठ अभियंते कांदोळकार हांणी ह्या शिश्टमंडळाक दिलें. हे समस्येचेर उपाय काडचे खातीर गांवांत बोरवेल खणची, अशी मागणी सुरेंद्र गोवेकार हांणी केली. बोरवेलीचो प्रस्ताव आमी धाडटात, ताचेर पंचायतीन फुडले प्रक्रिये खातीर फाटपुरवण करची, अशी सुचोवणी कनिश्ठ अभियंत्यान केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
