पेडणें पालिकेंत मनमानी कारभार?

भांगरभूंय | प्रतिनिधी

कामगारांचें पगारा खातीर धरणें आंदोलन; अर्द्या दिसांतूच काडलो नगराध्यक्षान उपाय

भांगरभूंय । प्रतिनिधी

पेडणें: पेडणें नगरपालिकेन मनमानी पद्दतीन कारभार चलयला. एक यूडीसी कर्मचारी कामगारांचो हक्काचो पगार तांचें बील वेळार सादर करिना ताका लागून दोन- दोन, तीन- तीन म्हयने मेळना. ताचो निशेध म्हूण पेडणें पालिकेच्या हंगामी कामगार, नितळसाण करपी कामगार हांणी पगार मेळना ते मेरेन काम करचें न्हय, असो निर्णय घेवन धरणें आंदोलन सुरू केलें.

ते उपरांत मुख्याधिकारी अनील राणे, नगराध्यक्ष माधव सिनाय देसाय हांणी कामगारां कडेन चर्चा करून सोमार मेरेन पगार नियमीत दिवपाचें उतर दिलें. ते उपरांत कामगारांनी आपलो संप फाटीं घेवन कामाक सुरवात केली.

एक यूडीसी कर्मचारी आनी लेखाधिकारी हे कामाचेर वेळार येनात. त्या दोगांक लागून पगार दिवपाक कळाव जाता, अशी कागाळ कामगारांनी मुख्याधिकारी राणे हांचे कडेन नदराध्यक्षान केली. ते भायर मुख्य यूडीसी क्लार्क सकाळींच कामाचेर येतना सोरो पियेवन येता, अशीय कागाळ कांय कामगारांनी केली. सोमारा पालिकेची म्हत्वाची बसका आपयल्या. ते बसकेक नियुक्त नगरसेवक तशेंच आमदार प्रवीण आर्लेकार हाजीर रावतले. त्या वेळार ह्या विशयाचेर योग्य तो निर्णय घेतले, अशें  उतर मुख्याधिकारी आनी नगराध्यक्ष हांणी ह्या वेळार दिलें.

कामगारांच्या म्हणण्या प्रमाण ते सकाळ सावन रस्त्या वयलो कोयर एकठांय करतात. पूण तांचो हक्काचो पगार वेळार मेळना. तो पगार वेळार मेळचो हे खातीर धरणें आंदोलन सुरू केलां. आमच्यो मागण्यो मान्य जाल्यो जाल्यारूच आमी काम करतले, नाजाल्यार हें आंदोलन चालूच उरतलें, अशी शिटकावणी कामगारांनी दिली.

बिरेस्तारा पेडण्यां सप्तकी बाजार भरता. ताचो कोयर हे कामगार एकठांय करतात. पूण बाजाराच्या दुसऱ्या दिसा कामगारांनी अचकीत संप केल्ल्यान बाजारांत सगळे कडेन कोयर जाल्लो दिश्टी पडटालो. कांय वेवसायिकांनी आपल्या दुकानां मुखा वयलो कोयर स्वता एकठांय केलो. हें चित्र सकाळीं 9.30 वरां मेरेन दिसतालें. दनपारां 11.45 वरांच्या सुमाराक कामगारांनी संप फाटीं घेतलो.

पेडणें पालिकेंतल्या एका यूडीसी कर्मचाऱ्याक लागून कामगारांचो पगार वेळार जायना, हें नगराध्यक्ष माधव सिनाय देसाय हांणी मान्य केलें. हे मुखार कामाक आंग मारप्यांक भोगसुचे नात. दरेकल्यान आपापलें काम वेळार आनी वेवस्थीत करचें, अशें तांणी सांगलें.

फाटल्या वर्सां सावन पालिकेच्या कर्मचाऱ्यांक आनी कामगारांक म्हयन्याक 200  रुपयांनी वाड जाल्या. ती पगारवाड आयज मेरेन यूडीसी कर्मचारी वेवस्थीत बील सादर करिनाशिल्ल्यान मेळना. हाचेर जाप दितना नगराध्यक्षान सांगलें, ह्या म्हयन्या सावन वाडीव पगार मेळटलो. उरिल्लो वाडीव पगार टप्प्याटप्प्यान दितले. वेळार पीएफ भरचे खातीर आपूण लक्ष दितलों, अशें नगराध्यक्षान सांगलें.

बसकेंत कामाच्या वेळाचेर जातली चर्चा

पेडणें पालिकेच्या कर्मचाऱ्यांचो वेळ सकाळीं 9.30 ते सांजेच्या 5.30 वरां मेरेन आसता. पूण सकाळीं 10.30 वरां उपरांत लेगीत कर्मचारी कामाचेर हाजीर नासता, हें पालिकेक भेट दिले उपरांत कळ्ळें. तातूंत लेखाधिकारी जाल्यार दनपारां 11.45 वरांच्या सुमाराक येता आनी सांजेच्या 4 वरांच्या सुमाराक घरा वता, अशी कागाळ कामगारांनी मुख्याधिकाऱ्या कडेन केली. ह्या प्रस्नाचेरूय सोमारचे बसकेंत योग्य निर्णय घेतले, अशें आस्वासन नगराध्यक्ष माधव सिनाय देसाय हांणी दिलें.