भांगरभूंय | प्रतिनिधी
भांगरभूंय । प्रतिनिधी
म्हापशेंः कळंगुटे हांगा एका हॉटेलाची कूड आनी पर्वरी एक फ्लॅट फोडून चोरांनी चार लॅपटॉपसयत 3.74 लाख रुपयांचो म्हालवज फारायलो. पुलिसांनी दिल्ले म्हायती प्रमाण गौरावाडो कळंगुटे हांगच्या हॉटेलाची कूड फोडपाचो प्रकार बुधवारा फातोडेर जालो.
झारखंडातले रवी कुमार, गणेश कांथे आनी अशोक नायक हे हॉटेलांचे कुडींत रावताले. अनवळखी चोरांनी ही कूड फोडून एक निसर निट्रो, दोन मॅकबूक प्रो अशे तीन लॅपटॉप, दोन घड्याळ्यो मेळून 2.99 लाख रुपयांच्यो वस्ती आनी कागदपत्रां चोरून व्हेलीं. कळंगुटे पुलिसांनी गुन्यांव नोंद केला.
चोरयेची दुसरी घडणूक पर्वरी चोगम रस्त्या वयल्या टॅक्नो पार्क इमारतींत घडली. चोरांनी 1 तें 16 नोव्हेंबर मजगतीं बंद आशिल्ल्या फ्लॅटाचें कुलूप तोडून भिरत प्रवेश केलो आनी एक एचपी लॅपटॉप, दोन मोबायल आनी हेर मेळून 75 हजार रुपयांचो म्हालवज फारायलो. सिद्धेश कळंगुटकारान केल्ले कागाळे वयल्यान पर्वरी पुलिसांनी अनवळखी चोरां आड गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
