भांगरभूंय | प्रतिनिधी
भांगरभूंय । प्रतिनिधी
सांगेंः सांग्याचो आदलो आमदार प्रसाद गांवकार हांणी जेन्ना आयआयटी प्रकल्प सांग्यार हाडपाचे यत्न चलयल्ले तेन्ना ताका विरोध करपा खातीर सुभाष फळेदसाय आमकां तेंको दितालो. आतां स्वता आमदार आनी मंत्री जातगीर तो आयआयटी समर्थक जावन आमच्या जीवार उठला. आयआयटी विरोधक आशिल्लो समर्थक कसो जालो, असो प्रश्न सांगें बचाव समितीन दांडो- सांगें हांगा आयोजीत केल्ले पत्रकार परिशदेंत कोस्तांव मस्कारेन्हास हांणी केलो. हें अशें घडपा फाटल्यान सुवार्थ आसा हें लोकांक सांगपाची गरज ना. आमी कश्ट करून पोट भरतात ती आमचीं शेतां-भाटां वाटावपा खातीर आमी मुखार सरल्यात. सुभाष फळदेसाय पुलिसां वरवीं आमकां मार बडय करून आयआयटीक आशिल्लो आमचो विरोध मोडून काडपाक सोदता असो आरोप तांणी केलो. सांगें बचाव आंदोलनाक 59 दीस पुराय जाल्ले खातीर ही पत्रकार परिशद आयोजीत केल्ली. शेतकार आनी सैम मोगी ह्या वेळार हाजीर आशिल्ले.
2018 वर्सा जेन्ना आयआयटी सांग्यार हाडपाचें चलिल्ले तेन्नाच आमी ताका विरोध केल्लो. सुभाष फळदेसाय तेन्ना आमच्या वांगडा आशिल्लो. आतां आमी भिवून आयआयटीक विरोध करपाचें सोडून दिवचें हे खातीर तो सरकारी यंत्रणा आपल्याक जाय तशी वापरपाक लागला, असो आरोप सान्तान रॉड्रिग्ज हाणे ह्या वेळार केलो. आमी सैमाची राखण आनी सांग्याक वाटावपा खातीर झगडटात. आमदारान आमकां भिस्टावन उडोवपाचें कितलेय यत्न केलें तरी निमाण मेरेन आमचो आयआयटीक विरोध आसतलो आनी निमाणे सत्याचें जैत जातलें अशें तांणी सांगलें.
गोंय मंत्रिमंडळांतलो उदकास्रोत मंत्री सुभाष शिरोडकार शेतां पिकावळी खाला हाडपा खातीर खात्या वतीन सगळ्यो सुविधा दिवपाचें उतर दिता. जाल्यार सांगेकारांक कुस्कुटाचोय फायदो नाशिल्लो आयआयटी प्रकल्प हाडून आमचो आमदार आमचीं शेतां- भाटां ना नपयत करपाक सोदता अशें आम आदमी पक्षाचे सांगे मतदारसंघ गटाध्यक्ष मिल्टन फर्नांडीस हांणी सांगलें. सांग्याची सैम गिरेस्तकाय, शेतां, वझरे, दोंगोर राखून दवोरपा खातीर मजत करपाचें आवाहन तांणे मुख्यमंत्री डॉ प्रमोद सावंत, कृशी मंत्री रवी नायक आनी उदकास्रोत मंत्री सुभाष शिकोडकार हांका केलां.
फाटल्या आयतारा मळकर्णे हांगा घडोवन हाडिल्ले जल ही जीवन है कार्यावळीक शेतकार म्हणून आमी गेल्लीं तेन्ना पुलिसांनी बायलाचें दुपट्टे काडून घेतले, आमच्यो पर्शी उस्तियल्यो, ही सतावणूक कित्याक चल्ल्या, अशें ज्युलियेत रिबेलो हिणे विचारलें. जें आमकां नाका ताका विरोध करपाचो हक्क आमकां देशाच्या संविधानान दिला. आमची पुलिसां वरवी सतावणूक करपाक आमी कितें टॅररिस्ट काय कितें, अशें तिणे तिडकीन सरकाराक विचारलां. सांगेंकारांक आयआयटी नाका जाल्यार ती शिरोड्यांत व्हरपाची तयारी दाखोवपी सुभाष शिरोडकार हांका पत्रकार परिशदे खातीर आयिल्ले शेतकार तशेंच सैम मोगींनी परबीं दिली
—————————————————————————-
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
