भांगरभूंय | प्रतिनिधी
भांगरभूंय । प्रतिनिधी
वास्कोः 2012 वर्सा सत्तेर आयिल्ल्या मनोहर पर्रीकार सरकारान गोंयांतल्या बेकार तरणाट्यांक बेकार भत्तो दिवपाचें जाहीर केल्लें. ते उपरांत तीन विधासभा वेंचणुको जावन भाजपा अजून सत्तेर आसूनय बेकार तरणाट्यांक नोकऱ्यो ना त्यो नात, बेकार भत्तोय मेळूंक ना. भाजपाचे राजवटींत कामगारांक लेगीत मागण्या खातीर रस्त्यार येवचें पडटा अशें प्रदेश काँग्रेस अध्यक्ष अमीत पाटकार हांणी सांगलें. वेर्णा उद्देगीक वसणुकेंतल्या आयएफबी कंपनीच्या संपार आशिल्ल्या कामगारांचीं पाटकार हांणी विरोधी पक्ष फुडारी युरी आलेमांव आनी केंपेंचो आमदार एल्टन डिकॉस्ता हांच्या वांगडा भेट घेतली. उपरांत ते पत्रकारां कडेन उलयताले.
आयएफबी कंपनी कडेन उलोवन कामगारांचो प्रश्न सुटावो करपाचो यत्न काँग्रेस पक्ष करतलो अशें पाटकार हांणी संपार आशिल्ल्या कामगारांक सांगलें. बेकार भत्तो दिवपाचें वेंचणुकां वेळार आश्वासन दिवपी भाजपान कितल्या बेकार तरणाट्यांक तांच्या सरकारान बेकार भत्तो दिला हाचो आंकडो सादर करपाचें आव्हान पाटकार हांणी मुख्यमंत्री डॉ प्रमोद सावंत हांका दिलां तशेंच आयएफबी कामगाराच्या प्रश्नांत लक्ष घालपाची सूचोवणी तांका केल्या.
फाटल्या तीन वर्सां सावन कामार आशिल्ल्या कामगारांची सेवेंत कायम करपाची मागणी आसा. ते खातीर तांका संप करचो पडटा सरकाराक लजेक घालपा सारकी गजाल आसा अशे युरी आलेमांव हांणी सांगलें. आयएफबी कामगारांच्या प्रश्नांत लक्ष घालपाची सरकाराची तयारी दिसना. असंवेदनशील भाजपा सरकार सरकारी नोकऱ्यो विकता आनी खाजगी मळायल्या कामगारांक रस्त्यार येवपाक लायता असो आरोप आलेमांव हांणी केला. गोंयां भायल्यांक कामार घेवन खाजगी कंपन्यो गोंयकारांक बेकार करपाक लागल्यात अशें तांणी सांगलें. भाजपा रोजगार मेळाव्याच्या नांवान बेकार तरणाट्यांक फटयत आसा असोय आरोप आलेमांव हांणी केलो.
भाजपाचे राजवटींत गोंयकार तरणाट्यांक फुडार ना. तीन वर्सां सांवन काम करपी गोंयकार तरणाट्यांक आयएफबी कंपनी कामा वयल्याक काडपाक सोदता. हेर कंपन्योय तेंच करपाचे वाटेर आसात. खाजगी कंपन्यांक थळाव्या लोकांक 80 टक्के रोजगार हें सगळें फटींगपण अशें आमदार एल्टन डिकॉस्ता हांणी सांगलें. वेर्णा उद्देगीक वसणूक आशिल्ली सुवात गोंयकारांची आसा. ताका लागून थंयच्या कंपन्यांत चडांत चड गोंयकारांक रोजगार मेळपाक जाय अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
