भांगरभूंय | प्रतिनिधी
पणजीः दक्षीण गोंयच्या जिल्हो दंडाधिकाऱ्यान करासवाडो म्हापशेंच्या कुरेशी मीट ट्रेडर्स असेसिएशन ऑफ गोवा हाका शेजारच्या राज्यांतल्यान म्हशीं हाडून उसगांवच्या गोवा मीट कॉम्प्लेक्स लिमिटेडांत कत्तल करपा खातीर व्हरपाची परवानगी दिल्या.
परवानगी दितना घाल्ल्यो अटी फुडें दिल्ले प्रमाण. फक्त भलायकेन निरोगी म्हशींचे येरादारी खातीर शिथिलताय आसतली, जनावरांक कत्तल करपा खातीर थेट उसगांवच्या गोवा मीट कॉम्प्लेक्स लिमिटेडांत देंवयतले, न्हयकारिल्ली जनावरां आसत जाल्यार तांकां पीसीए कायद्या खाला (येरादारी नेम) थारायिल्ले गरजेचे उपचारिकता पुराय करून थेट उखलून परतून मूळ सुवातेचेर व्हरतले, एलएसजीच्या संकर्कांत येवंक नाशिल्लीं जनावरां हाडचीं, एलएसडीचो परिणाम जाल्ल्या वाठारांतल्यान आनी कळपांतल्यान जनावरां हाडचीं न्हय आनी दरेके खरेदी वेळार सक्षम सरकारी प्राधिकरणा कडल्यान जारी केल्लीं गरजेचीं प्रमाणपत्रां वांगडा आसपाक जाय, जातींत जनावरांक एसएलडीचो संसर्ग जाल्ल्या वाठारांतल्यान आनी परिणाम जाल्ल्या कळपांतल्यान हाडूंक नात, अशें नमूद केल्लें आसपाक जाय. हो आदेश 16 नोव्हेंबर ते 22 नोव्हेंबर 2022 मेरेन लागू आसतलो. हो आदेश मोडप्यांक भारतीय दंड संहितेच्या कलम 188 खाला ख्यास्त मेळटली, अशें संबंदितांनी कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
