भांगरभूंय | प्रतिनिधी
22 खेपेचो ग्रॅण्ड स्लॅम वस्ताद राफायल नादालाचें एटीपी फायनल्सांतलें आव्हान सोंपलें. हे हारीक लागून हे सर्तीचो किताब जिखपाचें ताचें सपन परतून एकदां भंगलें. सर्तींत पयले खेळपी फॅलिक्स आगर एलियास्सिमे हाणें नादालाक 6-3 आनी 6-4 अशा सरळ सेटांनी हारयलो. गट पांवड्या वयली नादालाची ही सेगीत दुसरी हार थारली. तशेंच तिसऱ्या सिडा वयल्या कॅस्पर रुडान टेलर फ्रिट्जाक हारोवन नादालाचें आव्हान सोंपलें हें निश्चीत केलें.
ह्या निकाला उपरांत कार्लोस अल्काराज रॅंकिंगेंत पयले सुवातेर वर्साचे अखेर मेरेन कायम उरप निश्चीत आसा. नादाल कारकिर्दींत सेगीत चार मॅची हारलो. अमेरिकन ओपन आनी पॅरीस उपरांत ताची ही सेगीत चवथी हार थारली. हंगामाची सुरवात ताणें उत्कृश्ट केल्ली. ऑस्ट्रेलियन ओपन आनी फ्रॅंच ओपन सर्त जिखिल्ली. पूण, दुखापतीक लागून ताका विम्बल्डनाचे सेमी फायनलींतल्यान फाटीं सरचो पडिल्लो.
नादाल 10 खेपे एटीपी फायनल्सांत खेळ्ळा. पूण, ताका एकदाय ही सर्त जिखपाक जमूंक ना. 2010 आनी 2013त ताक उप वस्तादपणाचेर समाधान मानचें पडिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
