भांगरभूंय | प्रतिनिधी
मुख्याधिकारी रजेचेर; बेकायदो इमारतीची दक्षता खात्या वतीन चवकशी करपाचो थाराव
भांगरभूंय । प्रतिनिधी
दिवचलः दिवचल पालिका वाठारांत अधिकारी वर्गान एके इमारतीक कायदेशीर सोपस्कार पुराय करिनासतनाच मंजुरी दिल्ल्याचें प्रकरण 16 नोव्हेंबराक जाल्ले दिवचल पालिका मंडळाचे बसकेंत बरेंच तापलें. ह्या मुद्द्याचेर वादळी चर्चा जावन ते इमारतीच्या प्रकरणाची दक्षता खात्या वतीन रितसर चवकशी करपाचो थाराव पालिका मंडळाचे बसकेंत मंजूर केलो.
मजगतीं, ह्या इमारत प्रकरणांत पालिका मंडळान अधिकाऱ्यांनी आडनदर केल्ल्याचो आरोप केलो. पालिका मंडळाचे विशेश बसकेक मुख्याधिकारीच रजेचेर गेल्ल्यान बेकायदो असो आरोप केल्ले इमारती विशीं नगरसेवकांनी आक्रमक भुमिका घेवन ह्या प्रकरणाची ताकतिकेन तपास करपाची नेटाची मागणी केली.
मुख्याधिकारी पदाचो ताबो सध्या उपजिल्होधिकारी रोहन कासकार हाचे कडेन आसा. तांकां ह्या प्रकरणाची खोलायेन म्हायती करून घेवची पडटली, अशें नगरसेवकांनी म्हणलां.
हे बसकेक आमदार डॉ. चंद्रकांत शेट्ये हाजीर आशिल्ले. बसकेंत निलेश टोपले, सुदन गोवेकार, रियाज बेग, दीपा शिरगांवकार, गुंजन कोरगांवकार, अनिकेत चणेंकार ह्या नगरसेवकां सयत नगराध्यक्ष कुंदळ फळारी हांणी आक्रमक भुमिका घेवन बेकायदो गजालींक अधिकारी वर्गान थारो दिवचो न्हय, तातूंत नगरसेवकांचें नांव घाण जाता, अशें सांगलें.
पालिका मंडळाचे बसकेंत अधिकारी आनी कर्मचारी तशेंच पालिका मंडळ हांचे मदीं समन्वयाचो उणाव आशिल्ल्याचें चर्चे वेळार दिसले. ह्या वेळार आमदार डॉ. शेट्ये हांणी खर उतरांनी अधिकारी वर्गाचेर बडी मारली.
पालिका कामकाज हाताळटना सरकारी अधिकारी, कर्मचारी हांणी योग्य पद्दतीन नगरसेवकांक मार्गदर्शन करचें. चुकीच्या गजालींक तेंको दिवचो न्हय. तशेंच उदरगतीचे बाबतींत आनी हेर गजालींनी नगरसेवकांनी संघटीत रावून योग्य आनी अयोग्य हाचें खरेंपण तपासून फुडें वच्चें, अशें आमदार डॉ. शेट्ये हांणी सांगलें.
बसकेंत खूबशे विशय चर्चेक आयले. कामां जायनात, खूबशे गजालींची फाटपुरवण करून लेगीत कांय फायदो जायना, रस्त्याद सुणीं रस्त्यांचेर त्रासदिणी थारतात, खूबश्यो येवजण्यो चालीक लागनात, अश्या साबार विशयांचेर चर्चा जाली. जे तात्पुरते गाडे आसात, ते ताकतिकेन थंयच्यान काडचे, अशी मागणी बसकेंत जाली. पार्कींग समस्या, नितळसाण, वीज, उदक, गटार येवजण बांदकामां, सरकारी अनुदान तशेंच उदरगत निधी, नगरसेवकांचें मानधन हे संबंदांत नगरसेवकांनी विचार मांडले. कांय मुद्द्यांचेर वादळी चर्चाय जाली.
लोकप्रतिनिधींक गृहीत धरचे न्हयः डॉ. शेट्ये
सरकारी कर्मचारी, लोकप्रतिनिधींक गृहीत धरून तुमकां जाय तशे वागतले जाल्यार तें चलचें ना. फक्त 20 टक्के लोकांक खोशी करचे खातीर बेकायदो गजालींचें समर्थन करून 80 टक्के लोकांची नाराजी तुमी ओडून घेवं नाकात. ताका लागून पालिका मंडळाचें नांव गरजे भायर पेड्डेर जाता. पालिका अधिकारी आनी कर्मचारी हांकां योग्य पद्दतीन काम करपाक आनी आदार करपाक जायना जाल्यार तशें तांणी सांगचें. आमी मंत्र्या कडेन उलोवन तांची दुसरे कडेन वेवस्था करता. लोकांची सेवा आनी काम करपा खातीर लोकप्रतिनिधी आसात. पांच वर्सां खातीर ते नगरसेवक आसतले, अशें समजून कोणेंच वागचें न्हय, अशा उतरांनी आमदार डॉ. चंद्रकांत शेट्ये हांणी अधिकारी वर्गाक समज दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
