भांगरभूंय | प्रतिनिधी
कळंगूट मतदारसंघ मंचः गोंय दर्यादेग वाठार वेवस्थापन प्राधिकरणाक निवेदन
भांगरभूंय । प्रतिनिधी
म्हापशें: सीआरझॅडाच्या 200 मिटर हद्दींत उदरगत कामांच्या नांवा खाला दर्यादेगे वयलीं वनस्पत, रेंवेच्यो राशी आनी भांगराळी- धवे रेंवेची नासाडी करून पर्यावरणाचें घट्टण करचें न्हय, अशी मागणी करपी निवेदन कळंगूट मतदारसंघ फोरमान गोंय दर्यादेग वाठार वेवस्थापन प्राधिकरणाक भेटयलां.
कळंगूट मतदारसंघ मंचाचे समन्वयक प्रेमानंद दिवकार हांच्या फुडारपणा खाला एका शिश्टमंडळान कांदोली पंचायतीक निवेदन सादर केलें. तशेंच पंचायतीच्या वाठारांतले दर्यादेगेचे सुरक्षे खातीर निदर्शनां केलीं. ह्या निवेदनाच्यो प्रती गोंयचे मुख्य सचीव, पर्यावरण सचीव, जिल्होधिकारी आनी कांदोळी पंचायतीक धाडल्यात.
सिकेरी ते बागा मेरेनच्या दर्यादेगेचें उदरगत कामाच्या नांवा खाला सीआरझॅड नेम मोडून आनी भरती रेशेच्या अविकसीत वाठारांतली वनस्पत, रेंवेचे राशींचो नाश करतात. तशेंच पर्यावरण संरक्षण कायदो 1986 सहजतायेन मोडटात, असो दावो मंचान निवेदनांत केला. कांदोली आनी कळंगूट दर्यादेगेच्या 200 मिटर भितर अविकसीत वाठारांत प्रकल्पांक परवानो प्रस्ताव आनी प्रक्रियेची फाटपुरवण सक्षम अधिकाऱ्यां कडल्यान जायना. अशा प्रकल्पांक जर परवानगी वा परनाने तशेंच ना हरकत दाखले दिल्यात जाल्यार तांची मान्यताय रद्द करची, अशीय मागणी मंचान प्राधिकरणा कडेन केल्या. तशेंच अशे कायदे मोडप्यां आड कारवाय करपाक सक्षम अधिकारी अपेशी थारिल्ल्यान आमी हे जनहितार्थ निवेदन सादर केलां, अशें मंचान म्हणलां.
हरीत लवादा कडेन वचपाची मंचाची शिटकावणी
पर्यावरण संबंदांत फाटल्या दोन म्हयन्यांत आमी संबंदीत अधिकाऱ्यां कडेन खूबश्यो कागाळी दाखल केल्यात. ह्या कागाळीं वयल्यान संबंदितांचेर कारवाय करपाक हे अधिकारी पुराय अपेशी थारल्यात. ताचेर योग्य कारवाय जाली ना जाल्यार आमी हरीत लवादा कडेन वतले. हे दर्यादेगे वयले आपले मालमत्तेचें पर्यटन खात्यान सर्वेक्षण करचें आनी तांचे मालमत्तेंत आशिल्लीं बांदकामां मातये भरवण करचीं, अशें कळंगूट मतदारसंघ मंचाचे समन्वयक प्रेमानंद दिवाकर हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
