भांगरभूंय | प्रतिनिधी
संवसारीक टी-20 क्रिकेट सर्तींत भारताचें आव्हान सोंपतकच पंगडाचे रचणुके संबंदीं वेगवेगळीं मतां मुखार येवपाक लागल्यांत. तरणाट्या खेळगड्यांचेर भर दिवपा वांगडाच टॅस्ट आनी मर्यादीत ओव्हरीचे क्रिकेट खातीर दोन वेगळेवेगळे पंगडांची मागणी जावपाक लागल्या.
इंग्लंडा आड उपांत्य फेरयेंत हारल्या उपरांत आदलो मुखेली अनील कुंबळेन भारताच्या खेळगड्यांक विदेशी लिगेंत खेळपाक परवानगी दिवची अशी मागणी केल्ली. आतां कुंबळेनूच दोन वेगळेवेगळे पंगड तयार करपाचें मत मांडलां.
वन डे आनी टी-20त इंग्लंडाक मेळिल्ल्या येसा उपरांत धबो बॉल आनी तांबडो बॉल क्रिकेटी खातीर वेगळेवेगळे पंगड आसचे अशी चर्चा सुरू जाल्या.
कुंबळेन म्हणलें, तुमकां वेगळेवेगळे पंगड जाय पडटात. हें इंग्लंडान दाखोवन दिलें. तशेंच फाटले संवसारीक टी-20 क्रिकेट सर्तीचो वस्ताद ऑस्ट्रेलियेन लेगीत चडांतचड अश्टतासांच्या खेळगड्यांची गरज लागता, हें दाखोवन दिल्लें.
इंग्लंडाच्या पंगडांत लियाम लिव्हिंगस्टोन सातवे सुवातेर बॅटिंगेक येता. हेर खंयच्याच पंगडा कडेन सातवे सुवातेर लिव्हिंगस्टोना सारको बॅट्समन ना. ऑस्ट्रेलिये खातीर मार्कस स्टोयनीस सवे सुवातेर बॅटींग करता. तुमका अशे तरेचो पंगड तयार करचो पडटलो. वेगळो मुखेली वा प्रशिक्षक आसचो हे विशीं आपूण निश्चीत ना. तुमी कशे तरेन पंगडाची निवड करतात हाचेर सगलें निंबून आसता. ते उपरांत तुमकां कशे सहाय्यक आनी मुखेली जाय हें निश्चीत करचें अशें कुंबळेन मुखार म्हणलें.
भारताचे क्रिकेटर विदेशी लिगांनी खेळनात, हें तांचे संवसारीक टी-20 सर्तींतलें प्रदर्शनांतलें एक कारण आसा अशें वॅस्ट इंडिजाचो आदलो मुखेली डॅरेन सॅमीन म्हणलें. भारताच्या खंयच्याच सक्रीय खेळगड्याक विदेशी लिगांनी खेळपाची परवानगी ना. इंग्लंडाच्या खेळगड्यांनी विदेशी लीग खाशेलपणान ऑस्ट्रेलियेची बीग बॅश खेळपाचो फायदो जालो अशें सॅमीन मुखार म्हणलें.
2024त जावपी संवसारीक टी-20 सर्ती पयलीं हार्दिक पांड्याक पुर्णकालीन मुखेली म्हूण नेमचो आनी न्युझिलॅण्डा आडचे माळे सावन पंगडाची पुनर्निमाण प्रक्रिया सुरू करची अशें निवड समितीचे आदले अध्यक्ष कृष्णमाचारी श्रीकांतान म्हणलें.
आपूण निवड समितीचो अध्यक्ष आशिल्लो, जाल्यार हार्दिकाक 2024चे संवसारीक टी-20 सर्ती खातीर मुखेलपदाची जापसालदारकी दितलो आसलों अशें ताणें मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
