भांगरभूंय | प्रतिनिधी
भांगरभूंय । प्रतिनिधी
बेळगांवः भारतीय डर्माटोलॉजिस्ट असोसिएशनाची (आयएडीव्हीएल) 13वी परिशद कर्नाटक राज्य डर्माटोलॉजिस्ट असोसिएशना वतीन बेळगांवात जातली. तातूंत कर्नाटक, महाराष्ट्र आनी गोंयांतले मेळून 500 डर्माटोलॉजिस्ट, व्हेनरॉलॉजिस्ट आनी लेप्रोलॉजिस्ट वांटेकार जातले. शेनवार 19 नोव्हेंबर आनी आयतार 20 नोव्हेंबर अशी दोन दीस ही परिशद जातली. कर्नाटक राज्य डर्माटोलॉजिस्ट असोसिएशनाचो अध्यक्ष डॉ रवी राठोड हांणी एके पत्रकार परिशदेंत ही म्हायती दिली.
बेळगांवच्या केएलई परिशद केंद्रांत जावपी हे परिशदेचें उक्तावण केईएल शिक्षण संस्थेचो अध्यक्ष डॉ प्रभाकर कोर हांचे हस्तुकीं जातलें. आयएडीव्हीएलाचे सरचिटणीस डॉ दिनेश कुमार देवराज ह्या वेळार हाजीर आसतले. देशांतले नामनचे काती दुयेंस उपचार तज्ज्ञ आपले निंबंद सादर करतले. देशांत ब्युटी पार्लर आनी हेर उपचारांच्या नांवान लोकांची लूट चल्ला. वैजकीय प्रमाणपत्रां नास्तना कांय जाण डेंटिस्ट म्हणून वेवसाय करतात.. तांका लागून दुयेतींचें चड लुकसाण जाता तशेंच कातीच्या दुयेंसाचे तज्ज्ञ आनी डेंटिस्टांचें नांव पिड्ड्यार जाता. परिशदेंत हें सगळें थांबोवपा खातीर भारतीय मेडिकल असोसिएशनाक उपाय येवजण करपाची शिफारस आमी करतले अशें डॉ राठोड हांणी सांगलें.
पत्रकार परिशदेक कर्नाटक डर्माटोलॉजिस्ट असोसिएशनाचे नवे अध्यक्ष डॉ प्रकाश कोलोलगी, परिशदेचे कार्याध्यक्ष डॉ एस व्ही मांजरेकार, डॉ विरेश व्हीडी, डॉ संतोष शिंदे, आनी आयोजक सचीव डॉ शिवकुमार पाटील हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
