भांगरभूंय | प्रतिनिधी
भांगरभूंय । प्रतिनिधी
वाळपयः राज्य सरकारान सरकारी प्राथमीक आनी माध्यमीक विद्यालयांक सुटके झुजारी व हुतात्म्यांची नांवां दिवपाचें थारायलां. ते फाटभुंयेर वाळपयच्या सरकारी उच्च माध्यमीक विद्यालयाक सुटके झुजारी सर्गेस्त दिपाजी राणे हांचो नांव दिवपाची मागणी पालक आनी नागरिकांनी केल्या. विद्यालयाच्या पालक-शिक्षक संघान दिपाजी राणे हांचें नांव निश्चीत करचे अशी सूचोवणी तांणी केल्या.
विद्यालयांच्या पालक-शिक्षक संघानी सुटके झुजारी व हुतात्म्यांच्या नांवाची शिफारस तालुको एडीआय वतीन करपाक सरकारान सांगलां. सत्तरींतल्या विद्यालयांक ही शिफारस करपाच्या कामाक सुरवात जाल्या. सत्तरी तालुक्यांत 107 प्राथमीक शाळा आनी 17 माध्यमीक शाळा आसात. 22 नोव्हेंबर मेरेन नांवाची शिफारस करपाक सांगलां. सत्तरींतल्या कांय गांवांनी सुटके झुजारी तशेंच हुतात्मे आसात. ताका लागून विद्यालयांक नांवां दिवपा वयल्यान वाद जावपाची शक्यताय आसा.
वाळपयच्या लोकां मदीं मात सरकारी उच्च माध्यमीक विद्यालयाक पोर्तुगिजांक नाका करून सोडपी दिपाजी राणे हांचे नांव दिवपा खातीर एकमत आसा. पालक- शिक्षक संघांनी नांवांची शिफारस केल्या उपरांत शिक्षण खात्याक अहवाल धाडटले अशे सत्तरी तालुक्याच्या एडीआयन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
