भांगरभूंय | प्रतिनिधी
भांगरभूंय । प्रतिनिधी
पणजीः ताळगांव हांगच्या 2013 वर्सा जाल्ल्या हसन खान खून प्रकरणांतल्या रॉबर्ट गोन्साल्वीस आनी शिवाजी पाटील हांका पुरावे नाशिल्ल्यान निर्दोश थारायल्लें. गोन्साल्वीस हांका निर्दोश थारावपाच्या निवाड्याक मुंबय उच्च न्यायालयाच्या गोंय खंडपिठान आव्हान दिवपाक राज्य सरकारान मान्यताय दिल्या. हे संबंदी फुडल्या दोन दिसांत खंडपिठान रीट याचिका सादर करतले अशें कळटा.
हसन खान हाची कूड बांबोळे होलीक्रॉस चर्च वाठारांत 22 मार्च 2013 दिसा एके कारींत मेळिल्ली. आगशी पुलिसांनी ह्या प्रकरणांत वीज खात्याचो कर्मचारी आशिल्ल्या रॉबर्ट गोन्साल्वीस हांचे सयत सात दुबावितांत अटक केल्ली. पणजेच्या उत्तर गोंय जिल्हो आनी सत्र न्यायालयांत आरोपपत्र दाखल करून केश सुरु जाल्ली. अभिनंदन पटेल, अनिल भुये, रवी पाटील, अरूण पाटील आनी अनिकेत यल्लुरकर ह्या पांच जाणांक जल्मठेप दिल्ली. मात रॉबर्ट गोन्साल्वीस आनी शिवाजी पाटील हांचे आड पुरावे नाशिल्ल्यान तांकां निर्दोश थारायल्लें. सत्र न्यायालयाच्या ह्या निवाड्याक उच्च न्यायालयांत आव्हान दिवपाक आतां सरकारान मान्यताय दिल्या. एक दोन दिसांत ते संबंदीची याचिका गोंय खंडपिठात सादर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
