भांगरभूंय | प्रतिनिधी
भांगरभूंय । प्रतिनिधी
पोरणे गोंयः पोरण्या गोंयांत सेंट फ्रान्सिस झेवियराचें फेस्त आनी नोव्हेनाते फाटभुंयेर गोंय सरकाराच्या संबंदीत खात्याच्या अधिकाऱ्यांच्या पंगडान बॅसिलिका बों जिजस चर्चीची तपासणी करून फेस्ताचे तयारेचो नियाळ घेतलो. उत्तर गोंय जिल्होधिकारी कार्यालयांतले अधिकारी, येरादारी खातें, बांदकाम खातें, उजो पालोवपी दल, भारतीय पुरातत्व सर्वे, पोरणे गोंय पंचायत हांच्या प्रतिनिधींनी ही तपासणी केली. अतिरिक्त जिल्होधिकारी संजीव देसाय हांणी फेस्ताच्या कामा संबंदी अधिकाऱ्यांक सूचोवण्यो केल्यो.
नोव्हेना आनी फेस्त बरे भशेन जावपा खातीर कसलें काम करपाक जाय हे विशीं देसाय हांणी चर्च अधिकाऱ्यांची मतां आयकून घेतलीं. पोरण्या गोंयांतल्या फेस्ताचे फेरयेंत मांड घालपी मांडकारांक वळखपत्रां दिवपाची सूचोवणी तांणी पोरण्या गोंयच्या सरपंच आनी सचिवाक केल्या. ही वळखपत्रां लोकांक दिसललीं अशी लावपाची सक्ती मांडकारांक करपाक तांणी सांगलां.
फेरयेंतले मांड तिसऱ्याक भाड्यान दिवपाक मेळचे नात. जांकां स्टॉल दिल्यात तांच्या वळखपत्रा वयल्या फोट्याचेर पंचायतीचो शिक्को मारून वळखपत्रां दितले. जांणी स्टॉल घेतल्यात तेच ते चलयतात हें पळोवपा खातीर पंचायतीच्या निरीक्षकांनी तपासणी करपाक जाय अशें देसाय हांणी पंचायतीक सांगलां. फेरयेंत स्टॉल घेतात ते चड पय़शे घेवन ते हेरांक भाड्यान दितात अशी कागाळ जॉन मस्कारेन्हास हांणी जिल्होधिकारी कार्यालयांत केल्ल्यान वळखपत्रांची सक्ती करपाचें थारायलां. तपासणी वेळार बॅसिलिकाचे रेक्टर फादर पॅट्रिसियो फर्नांडीस आनी पोरणे गोंयचे सरपंच सँड्रा गोन्साल्वीस हाजीर आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
