भांगरभूंय | प्रतिनिधी
भांगरभूंय । प्रतिनिधी
म्हापशेंः महसुली उत्पन्न वाडोवपा वांगडाच लोकांक सुरळीत वीज पुरवण करपाचो वीज खातें यत्न करता. ते नदरेंतल्यान बार्देश तालुक्यांतली वीज पुरवणेची समस्या सुटावी करपा खातीर साळगांवांत 350 कोटी रुपये खर्च करून वींज केंद्र सुरू करपाची घोशणा वीज मंत्री सुदिन ढवळीकार हांणी केल्या. वीज खातें परिवर्तनाचे दिकेन वाटचार करता अशें तांणी सांगलें
सोमाराक साळगांव मतदारसंघांतल्या नेरूल आनी रेईश मागुश पंचायत वाठारांत 19 कोटी रुपया खर्च करून जमनी पोंदच्यान वीज केबल्स घालपाच्या प्रकल्पाक सुरवात करून दिल्या उपरांत ते उलयताले. ह्या वेळार सांळगांवचो आमदार केदार नायक, वीज खात्याचे मुखेल अभियंतो स्टिफन फर्नांडीस, कार्यकारी अभियंतो प्रदीप नार्वेकार, जिल्हो पंचायत वांगडी संदीप बांदोडकार, नेरूलचो सरपंच सुदेश गोवेकार, रेईश मागुशची सरपंच सुस्मिता पेडणेकार हाजीर आशिल्ली.
चको सगल्यां कडल्यान जातात. त्यो सुदारपाचें काम करपाक जाय. एका गिरायकाक बिलिंग क्लार्काचे नजरचुके लागून 57 लाख रुपयांचें बील मेळ्ळें. अशे तरेच्यो चुको जावच्यो नात हाची दक्षता बाळगुवपाक आमी वीज खात्याच्या कर्मचाऱ्यांक सांगलां अशी म्हायती ढवळीकारान दिली. गांवांत वा वाड्यार वीज पुरवणेची समस्या आसल्यार म्हाका पत्र धाडात. ही समस्या सुटावी जातली. लोकांक सारकी वीज पुरवण जावची हाचे कडेन म्हजी नदर आसा अशें तांणी सांगलें.
वीज पुरवणेचो खर्च भागोवपा खातीर वीज खात्याचें महसुली उत्पन्न वाडोवपाची गरज आसा. सुरळीत वीज पुरवणे खातीर साळगांवांत नवें वीज केंद्र उबारतले. थिवी आनी फोंडें वीज केंद्राची दरेकी 45 कोटी रुपया खर्च करून सुदारणा करपाचें काम सुरू आसा. सांकवाळ आनी वेर्णा उद्देगीक वसणुकेंत नवीं वीज केंद्रा उबारतले अशें वीज मंत्र्यान सांगलें.
नेरून, रेईश मागुश वाठार मांडवी न्हंयच्या देगेचो वाठार आसा. हांका वीज पुरवणेची व्हड समस्या आसा. देखून जमनी पोंदच्यान उच्च दाबाची वीज वाहिनी घालपाचें काम हातांत घेतलां. 40 किलोमीटर वाठरांत जमीन खणपाचें काम करचें पडटलें. लोकांनी वीज खातें आनी कंत्राटदाराक सहकार्य करचें अशें सांळगांवचो आमदार केदार नायक हांणी ह्या वेळार मागलें. 6 म्हयन्यां भितर हें काम पुराय जातलें अशें तांणी सांगलें. वीज खात्याचो मुख्य अभियंतो स्टीफन फर्नांडीस हांणी प्रकल्पा विशीं म्हायती दिली. कार्यकारी अभियंतो प्रदीप नार्वेकार हांणे निमाणे सगल्यांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
