भांगरभूंय | प्रतिनिधी
रोटविलर सुण्याच्या धनयाक पुलिशेची शिटकावणी
भांगरभूंय । प्रतिनिधी
मुरगांवः हेडलँड सडा वाठारांत रोटविलर जातीच्या सुण्याक गळ्यांत पट्टो घालिनासतना मेकळो सोडटात. हे खातीर गोवा फर्स्ट हे बिगर सरकारी संस्थेच्या अध्यक्षान मुरगांव पुलीस स्टेशनाचेर कागाळ दाखल केले उपरांत त्या सुण्याच्या धनयाक मुरगांव पुलीस स्टेशनाचेर आपोवन समज दिली. सुण्याक परतून मेकळो सोडल्यार दंडात्मक कारवाय करतले, अशी शिटकावणी पुलिसांनी दिल्या.
हेडलँड सडा वाठारांतल्या लोफीस बारा कडल्यान एमपीटी कॉटर्साचे दिशेन एक ज्येश्ठ नागरीक सद्दां रातच्या 8 ते 10 वरां मजगतीं आपल्या रोटविलस सुण्या सयत पासय मारता. मात त्या सुण्याच्या गळ्यांत पट्टो घालिनासतना ताका मेकळो सोडटा. रोटविलर हो सुणो खुबूच घातक आसता. ताचे दात सुळ्या भशेन घट आसतात. ह्या सुण्यान घांस मारलो जाल्यार तो जिवाचेर येवपाक शकता. अश्या सुण्यांच्या हिंसक आनी मुडी सभावाक लागून खूबश्या राज्यांनी अशे सुणे पाळपाचेर बंदी घातल्या, अशें संस्थेन म्हणलां. हो सुणो बांदिल्लो नाशिल्ल्यान जर ताणें खंयच्याय मनशाचेर हल्लो केलो जाल्यार ताच्या धनयाक लेगीत तो नियंत्रणांत येना. हेच खातीर लोकांच्या जिवाक धोको निर्माण जावं शकता, अशें संस्थेन म्हणलां. मजगतीं, हाची दखल घेवन तशेंच सुरक्षेच्या कारणा वयल्यान गोवा फर्स्ट हे बिगर सरकारी संस्थेचे अध्यक्ष परशुराम सोनुर्लेकार हांणी मुरगांव पुलीस स्टेशनाचेर कागाळ दाखल केल्ली. ह्या प्रकरणाची चवकशी करून त्या सुण्याक भौशीक सुवातांचेर घेवन भोंवतना ताच्या गळ्यांत पट्टो घालपाक ताच्या धनयाक सांगचें, अशी विनवणी पुलिशेक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
