भांगरभूंय | प्रतिनिधी
अखेरेक एकदाची टी- 20 विश्व करंड क्रिकेट सर्त सोंपली. इंग्लंडान मेलबर्नांत पाकिस्तानाचेर पांच गडे राखून जैत जोडलें. एक तपा उपरांत तांकां टी – 20 करंडाचेर आपलें नांव परतून कोरांतपाक येश मेळ्ळां. पाकिस्तान भायर पडटलो, अशें सगल्यांक दिशिल्लें. फायनल मॅच भारत आनी द. आफ्रिका (वा पाकिस्तान) हांचे मदींच जातली, अशें शेंकड्यांनी व्हाॅट्सअॅप पदवीधर सांगताले. मात, नेदरलॅण्डान द. आफ्रिकेचेर जैत जोडलें आनी सगली सर्त आरत्याची परती केली. भोबशें तोंडांत वचपाच्या वेळार कावळ्यान झोंपय मारून तें व्हरचें, अशी तांची दरखेपे गत जाता. हे सर्तींतूय ती जाली आनी पाकिस्तानाक आयती संद मेळ्ळी.
द. आफ्रिके प्रमाण ऐन वेळार हात- पांय गाळटा म्हूण तांकां चोकर्स म्हणटात. पाकिस्तानाचें एके बाबतींत नांव आसा. तें म्हणल्यार निमण्या ओव्हरींनी जैत हातासपा खातीर. 1970 च्या दशका सावन तांच्या इम्रान, अक्रम, मियांदाद हांणीच न्हय, तर भोवतेक बाॅलरांनी ऐनवेळार मॅची घुंवडायल्यात. अर्थांत सगल्याच मॅचींनी ते जिखूंक नात. पूण ते हारता अशें खांप्या जाणकारांक पसून दिसतना तांणी घुरी घालून जैताचो करंड उबारला. आमीय निमण्या ओव्हरींनी जिखल्यात.
तशे क्रिकेटींत कोण जिखत, हारत तें निमणे ओव्हरी मेरेन सांगप शक्य नासता. उपांत्य फेरयेंत आमी इंग्लंडा कडल्यान 10 विकेटींनी हारतले अशें कोणाक दिशिल्लें? कालचे मॅचींत पाकिस्तानान 8 गडी वगडावन 137 धांवड्यो काडल्यो, तेन्नाच भोवतेक सगल्यांक इंग्लंडाचो पंगड कांय न्हय करून जिखतलो, अशें दिसतालें. पूण सुरवातीक आनी मदीं पाकिस्तानान मॅचीचेर ताबो मेळयिल्लो. कॅप्टन बटलर आवट जालो तेन्ना इंग्लंडाची पातमारी हालपाक लागिल्ली. तेन्ना बेन स्टोक्सान तिचेर नियंत्रण मेळयलें. मोईन अलीन वसीमाक धाडावचे पयलीं अशेंच दिशिल्लें. पाकिस्तानाचो शाहीन शाह आफ्रिदी कॅच घेतना पडलो. धोंपर धाडावलें. उपरांत स्वता बोलिंग घालपाक आयलो तेन्ना ताका चलप कठीण जालें. ती ओव्हर पुराय केली इफ्तिकारान. ताका स्टोक्सान चवको, सको मारलो. आफ्रिदीचें मैदान सोडप, स्टोक्साचो हल्लो… हांगाय मॅच घुंवली म्हणपाक मेळटा. अखेरेक इंग्लंडान ही मॅच बोल्सांत घाली. सगल्याच मॅचींनी ट्विस्ट, टर्न येताच. निमणो जो जिता वोही सिकंदर. हे सर्तींत नेदरलॅण्ड, झिम्बाब्वे, बांगलादेशानूय कांय मॅचींनी धक्को दिवपी निकाल दिल्यात.
इंग्लंडाच्या बेन स्टोक्सान अर्दशेंकडो मारिल्ल्यान ताका मॅन आॅफ द मॅच मेळपाक जाय आशिल्लें. पूण, 12 धांवड्यांनी तीन विकेटी घेवपी तरणाट्या सॅम करेनाक तो आनी प्लेयर आॅफ टुर्नामेंट अशे दोनूय पुरस्कार फावो जाले. तशें पळोवपाक गेल्यार सध्या पाकिस्तानाची बाॅलिंग संवसारांत क्रमांक एक आसा अशें म्हणचें पडटलें आनी इंग्लंड बाॅलिंगेंत तांचे परस खूब फाटीं आसा. तरीय इंग्लंडाक जैत मेळ्ळें. एका काळार वेस्ट इंडिज एका दिसाचे मॅचीचे (60, 50 ओव्हरी) क्रिकेट सम्राट आसले. आमी तांची घोडधांव 25 जून 1983 दिसा आडायली. मागीर आॅस्ट्रेलिया मुखार पावली. एक काळ कोणूच तांकां हारोवपाक शकनाशिल्ले. मजगतीं, आमच्या भारतान साबार सर्ती जिखून संवसारांत पयलो क्रमांक हातासलो. पाकिस्तानूय कायम पयल्या पांचांत आशिल्लो. श्रीलंकेच्या पंगडाचेर पाकिस्तानांत आतंकवादी हल्लो जायत सावन थंय कोण वचनात. तरीय पाकिस्तानान क्रिकेटींतली आपली आक्रमकताय तिगोवन दवरल्या. आमी खंय उणे पडले ताची खूब कारणां आसतलीं. ताचेर उपाय सोदपाक जाय. बीसीसीआयन हाचेर आत्मपरिक्षण करचें.
काल टी -20 फायनलींत एका भारतीय कमेंटेटरान एक वाक्य वाऱ्यार सोडलें. हांगां आॅस्ट्रेलियेंत थळाव्या क्रिकेट खेळगड्यांक जाय थंय हेडपाक मेळटा. तांकां कोण पळय पसून ना. (हीच गजाल स्पीनर शेन वाॅर्न हाणें कांय वर्सां पयलीं सांगिल्ली.) मात, आमच्या भारतांत लोक क्रिकेट खेळगड्यांक (आनी सिनेमा कलाकारांक) पळोवपाक घिट्टी करतात. आमी तांकां माथ्यार चडोवन दवरल्यात. मागीर हें येश तांचे तकलेक मारता, अशें ताणें म्हणलें. ही गजाल खरी आसली तरी तिचेर उपाय ना. आयज आमी आमच्या क्रिकेट खेळगड्यांक वायट उतरांनी पाचारतात, तरी फाल्यां मॅच जिखतकच आमीच वेळ- काळ विसरून तांकां तकलेर घेवन नाचतले…… आसूं. इंग्लंडाक सर्त जिखिल्ले खातीर परबीं दिवया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
