भांगरभूंय | प्रतिनिधी
विकास भगतः सभापतीन अहंकार सोडून दिवपाचो सल्लो
भांगरभूंय । प्रतिनिधी
काणकोणः जनार्दन भंडारी हांणी काणकोणचे आमदार तशेंच सभापती रमेश तवडकार हांकां निवेदन भेटोवन विवीध पांच कामां पुराय करपाची मागणी केल्या. तीं कामां मुजती भितर पुराय जालीं नात जाल्यार आंदोलन करतलेच, अशें युनायटेड ऑपोझिशन ऑफ काणकोण संघटणेचे पदाधिकारी विकास भगत हांणी पत्रकार परिशदेंत सांगलें.
लोकोत्सव हो आदिवासी कल्याण खातें, खेळां खातें, कला आनी संस्कृती खातें तशेंच हेर खात्यांच्या निधींतल्यान म्हणल्यार लोकांच्या पयशांतल्यान आयोजीत करतात. ताका लागून लोकोत्सव आपलो, राष्ट्रपतींक आपूण आपयता, अशी भास वापरपाचें आमदारान सोडचें. तशेंच अहंकार सोडून काणकोणच्या लोकांचीं कामां करचीं. फाटलीं 10 वर्सां गोंयांत भाजपाचें सरकार आसा. खोतीगांवांतलो टेलिफोन टॉवर, रस्ते आनी हेर उदरगतीचीं कामां कित्याक जावंक नात, ताचें तवडकार हांणी स्पश्टीकरण दिवचें. भाजपाचे भितरले गटबाजीक लागून उदरगत आडावल्या, असोय आरोप भगत हांणी केलो.
काणकोण व्हिजन 2030 चे बसकेक आपल्याक आपयिल्लो. काणकोणची उदरगत जावची, ह्या विचारान आमदारान आपयिल्ले बसकेक आपूण गेल्लों. आमदार उदरगतीच्या नांवाखाला राजकारण करपाक सोदता जाल्यार हे मुखार तांकां आपूण मातूय आदार करचो ना, अशें भगत हांणी स्पश्ट केलें.
हे पत्रकार परिशदेक वैष्णव पेडणेंकार आनी क्लेस्टन व्हिएगस हाजीर आशिल्ले. ह्या वेळार क्लेस्टन व्हिएगश आनी वैष्णव पेडणेंकार हांणी आमदार तवडकार हांचे वांगडा घडिल्ली घडणूक सांगली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
