पाकिस्ताना वटेन इतिहास, इग्लंडा वांगडा फॉर्म

भांगरभूंय | प्रतिनिधी

मुखेली बाबर आजम आयज जावपी संवसारीक टी-20 क्रिकेट सर्तीचे फायनलींत फॉर्मांत आशिल्ल्या इंग्लंडा आड आपल्या पंगडाक जैत मेळोवन दिवन पाकिस्तान क्रिकेटीच्या ‘हॉल ऑफ फेमां’त म्हान क्रिकेटर इम्रान खाना वांगडा सुवात मेळोवपाक इत्सूक आसतलो.

पाकिस्तानाचो फायनली मेरेनचो प्रवास सगल्यांक अजाप करपी आशिल्लो. मुळाव्या पांवड्यारूच सर्तींतल्यान भायर पडपाचे धडेर पाविल्लो. भारत आनी झिम्बाब्वे आड मेळिल्ल्या हारी उपरांत तांचो आत्मविस्वास सामकोच उणो जाल्लो. पूण, दुसऱ्या सप्तकांत पाकिस्तानान अनपेक्षीत रितीन पुनरागमन केलें आनी उपरांत दक्षीण आफ्रिकेक हारोवन आपली आस्त जिवी दवरली.

1992तले संवसारीक सर्ती भशेन चमत्कार जालो. दुबळ्या नॅदरलॅण्डान बळिश्ट दक्षीण आफ्रिकेक हारयलो. हे हारीक लागून आफ्रिकेचें सेमी फायनलींत पावपाचें सपन भंगलें आनी पाकिस्तानाची सेमी फायनलींत पावपाचीं दारां उक्तीं जालीं.

सेमी फायनलींत पाकिस्तानान न्युझिलॅण्डा आड जबरदस्त प्रदर्शन केलें. करात वा मरात स्थितींत पाकिस्तान चडशे खेपे बरें प्रदर्शन करता हें ताणें परतून एकदां सिद्ध केलें. आतां 1992चे संवसारीक सर्तीची पुनरावृत्ती जावची अशें पाकिस्तान क्रिकेट मोगी प्रार्थना करपाक लागल्यात. पूण, इंग्लंडाचो लेगीत ऑस्ट्रेलियेच्या मैदानांत इतिहासांत जुळिल्लो आसा.

सात वर्सां पयलीं म्हणल्यार 2015तले संवसारीक वन डे क्रिकेट सर्तींत बांगलादेशान गट पांवड्याचेरूच इंग्लंडाचें आव्हान सोंपयिल्लें. ते उपरांत इंग्लंड आनी वेल्स क्रिकेट मंडळान साबार यत्न करून मर्यादीत क्रिकेटींत बदल करपाक सुरवात केली. ते उपरांत ताणें सातत्यान बरें प्रदर्शन करपाक सुरवात केली. भारता आडचे दुसरे सेमी फायनलींत ताचें परतून एकदां दर्शन घडलें. ताचे खेळगडे प्रतिस्पर्धी पंगडांक भियेनासतना खेळपाक लागल्यात.

इंग्लंडाच्या जोस बटलर, अॅलेक्स हेल्स, बेन स्टोक्स आनी मोईन अली हांंचेर चेपण दवरपाक शाहिन शाह आफ्रिदी, मोहम्मद वासिम ज्युनियर आनी हॅरीस राउफ हांकां सर्वोत्कृश्ट प्रदर्शन करचें पडटलें.

संवसारीक टी-20 क्रिकेट सर्तीची फायनल आयज पाकिस्तान आनी इंग्लंड ह्या पंगडां मदीं जातली. मुखेली बाबर आजमाचो दोळो फॉर्मांत आशिल्ल्या इंग्लंडा आड आपल्या पंगडाक जैत मेळोवन दिवन पाकिस्तान क्रिकेटीच्या ‘हॉल ऑफ फेम’ म्हान क्रिकेटर