भांगरभूंय | प्रतिनिधी
20 वर्सां आदीं बांदिल्ली, पूण अजून उक्तावण ना
भांगरभूंय । प्रतिनिधी
सांगें: सांवड्डें मतदारसंघांत कश्टी काल्यां 2001 त बांदिल्ले मुळावे शाळेचें अजून उक्तावण जावंक ना. ताका लागून वापरा विणें आशिल्ली ही शाळेची इमारत सध्या तळीरामांचो अड्डो जाला.
सरकार शिक्षण मळाचेर आडनदर करता, हें फाटल्या दिसांनी वालंकिनी, कुमारी शाळांनी शिक्षक नाशिल्ल्या घडणुकांनी स्पश्ट जालां. 20 वर्सां आदीं बांदिल्ले शाळा इमारतीची सध्या आवतिकाय जाल्या. शाळेचीं दारां, जनेलां मोडल्यांत, नळे फुटल्यात. शाळे भितर सोऱ्याच्यो बाटल्यो तशेंच नाकाशिल्ल्यो वस्तू पडिल्ल्यो दिसतात. वापर करपाचोच ना जाल्यार सरकार त्यो इमारती कित्याक बांदता, असो प्रस्न गांवच्या लोकांनी उपस्थीत केला.
अशो इमारती फक्त कंत्राटदारांची बोल्सां भरपा खातीर बांदतात. आयज गांवगिऱ्या वाठारांनी 100- 150 वर्सां आदीं बांदिल्लीं मातयेचीं घरां अजून लेगीत घटमूट स्थितींत आसात. सरकाराचीं बांदकामां मात 10-12 वर्सांनीच मोडपाक पावतात. सरकारान अजून लेगीत ते शाळा इमारतीचें सोबितीकरण करून वापरपाक दिली जाल्यार शिक्षण खात्याचो फायदोच जावं येता, अशें ह्या वाठारांतले पालक आनी सुशिक्षीत लोक उलयतात.
थळावे नागरीक ॲड. अमर नायक हांणी पत्रकारां कडेन उलयतना सांगलें, 2001 त बांदिल्ले ही शाळा इमारत वापरा विणें दवरिल्ल्यान तिची दशा जाल्या. शिक्षण खात्यान तशेंच सरकारान तिचेर पुराय आडनदर केल्या. ते इमारतीची दुरुस्ती करून वाचपघर, बालवाडी, थळावी संस्था वा महिला मंडळाक दिवची. जाका लागून ते इमारतीची देखरेख तरी जातली आनी बरो वापरूय जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
