पाकिस्तान फायनलींत

भांगरभूंय | प्रतिनिधी

पाकिस्तानान संवसारीक टी-20 क्रिकेट सर्तीचे फायनलींत सुवात मेळयली. सिडनी क्रिकेट मैदानाचेर जाल्ले पयले सेमी फायनलींत ताणें बळिश्ट न्युझिलॅण्डाक 7 विकेटींनी हारयलो.

बॉलरांच्या उत्कृश्ट प्रदर्शना उपरांत बाबर आजम आनी मोहम्मद रिझवान हे जोडयेन एकाहातान जैत मेळोवन दिलें. मुखेली बाबर आजम म्हत्वाच्या खिणाक फॉर्मांत आयलो. ताणें अर्द शेंकड्याची खेळी करतना रिझवाना वांगडा विक्रम नोंदयलो. न्युझिलॅण्डा वतीन जैत मेळोवपा खातीर खाशेले यत्न जाताना दिसूंक ना. पाकिस्तानान फायनलींत प्रवेश केलो आनी क्रिकेट मोग्यांक 1992चे संवसारीक सर्तीच्या जैताच्या पुनरावृत्तीचीं सपना पडपाक लागलीं.

टॉस जिखून पयलीं बॅटींग करपी न्युझिलॅण्डान निर्धारीत 20 ओव्हरींनी 4 विकेटी वगडावन 152 धांवड्यो केल्यो. पाकिस्तानान प्रत्युत्तर दितना 19.1 ओव्हरींनी 3 विकेटी वगडावन गरजेच्यो धांवड्यो केल्यो.

पाकिस्तान 13 वर्सांनी संवसारीक टी-20 क्रिकेट सर्तीचे फायनलींत पावलो. ताणें 2009त निमाणे खेपे फायनलींत सुवात मेळयतना वस्तादपण जोडिल्लें.

मोखीचो फाटलाव करपी पाकिस्तानाक आजमान (53) आनी मोहम्मद रिझवान (57) हांणी ताबडतोड बॅटींग करू बरी सुरवात करून दिली. दोगांयनी पयले विकेटी खातीर 105 धांवड्यांची भागिदारी केली. पुर्ण सर्तींत दोनूय ओपनरांचेर जाणकार टिका करताले.

पयलेच ओव्हरींत न्युझिलॅण्डान व्हड चूक केली. बोल्टाच्या दुसऱ्या बॉलाचेर विकेटकीपर डॅव्होन कॉन्वेन बाबराची कॅच सोडली. त्या वेळार बाबराक खातें लेगीत उगडपाक जमूंक नाशिल्लें.

ते पयलीं न्युझिलॅण्डा वतीन 49 धांवड्यांचेर तीन विकेटी वगडायल्या उपरांत मुखेली केन विलियम्सन आनी डॅरील मिचेल हांणी डाव सांबाळ्ळो. दोगांयनी चवथे विकेटी खातीर 68 धांवड्यांची भागिदारी केली. अखेरीक शाहिन आफ्रिदीन ही जोडी फोडली. विलियम्सन 46 धांवड्यो करून बाद जालो. ते उपरांत मिचेलान पांचवे विकेटी खातीर जिमी निशामा वांगडा मेळून 22 बॉलांनी 35 धांवड्यांची भागिदारी केली. मिचेलान 35 बॉलांनी तीन चवके आनी एक सक्या सयत नाबाद 53 धांवड्यो केल्यो. निशाम 16 धांवड्यांचेर नाबाद उरलो.