भांगरभूंय | प्रतिनिधी
न्युझिलॅण्डाचो पंगड कागदाचेर जरी घटमूट पंगड दिसता आसलो, तरी आयज जावपी संवसारीक टी-20 क्रिकेट सर्तीचे पयले सेमी फायनलींत पाकिस्ताना आड ताका हार घेवची पडुये. आयसीसीच्या सर्तींचेर नदर मारली जाल्यार पाकिस्तानाक सेमी फायनलींत हारोवप न्युझिलॅण्डा खातीर एक सपन कशें थारलां.
पाकिस्तानाचो अंदूंचे संवसारीक टी-20 सर्तींतलो प्रवास चड उतारान भरला. पूण, न्युझिलॅण्डान सध्याचो वस्ताद ऑस्ट्रेलिया, श्रीलंका आनी आयर्लेण्ड हांकां हारोवन ग्रुप एकांत पयले सुवातेर रावन सेमी फायनलींत सुवात मेळयल्या.
दुसरे वटेन बाबर आजमाच्या फुडारपणाखाला खेळपी पाकिस्तान सुपर 12त भारत आनी झिम्बाब्वे हांच्या आड हारून रोखडोच बिटकी कवळून घरा वचपाच्या यत्नांत आशिल्लो. पूण, नॅदरलॅण्डान बळिश्ट दक्षीण आफ्रिका पंगडाक हारयलो आनी पाकिस्तानाचो सेमी फायनलींत पावपाचो मार्ग मेकळो जालो. पाकिस्तानान आपले निमाणे मॅचींत बांगलादेशाक हारोवन निमाण्या चारांतली आपली सुवात निश्चीत केली.
पाकिस्तान आतां इतिहासाची पुनरावृत्ती करपाक लागला अशें दिसपाक लागलां. पाकिस्तान 1992तले संवसारीक वन डे क्रिकेट सर्तीचे सेमी फायनलींत अनपेक्षीत रितीन पाविल्लो. त्या वेळार सेमी फायनलींत ताणें बळिश्ट न्युझिलॅण्डाक हारोवन पयलीं फायनलींत सुवात मेळयिल्ली आनी उपरांत इंग्लंडाक हारोवन वस्तादपण जोडिल्लें.
इतिहासाचेर नदर मारली जाल्यार ज्या ज्या वेळार न्युझिलॅण्डा सेमी फायनलींत पाकिस्ताना आड खेळ्ळा त्या त्या वेळार ताका हार घेवची पडल्या.
पाकिस्तानान 1992 आनी 1999चे संवसारीक वन डे क्रिकेट सर्तीचे तशेंच 2007तले संवसारीक टी-20 क्रिकेट सर्तीचे सेमी फायनलींत न्युझिलॅण्डाक हारयला. तशेंच मर्यादीत ओव्हरींच्या मोठ्या सर्तींनी न्युझिलॅण्डाक बरें प्रदर्शन करपाक जमूंक ना. ताणें फाटल्या चार संवसारीक सर्तीच्या सेमी फायनलींनी सुवात मेळयिल्ली. पूण, ताका अजून मेरेन वस्तादपण जोडपाक जमूंक ना.
न्युझिलॅण्डान सात वर्सांनी तीन फायनलींनी (2015 आनी 2019ची संवसारीक वन डे क्रिकेट आनी 2021ची संवसारीक टी-20) खेळ्ळा. पूण, तिनूय फायनलींत ताका हार घेवची पडल्या.
पाकिस्तानाच्या बॅट्समनांक अंदूंचे सर्तींत धांवड्यो करतना झुजचें पडलां. ताका लागून न्युझिलॅण्ड आयज सुरवातीकूच धपके दिवन पाकिस्तनाचेर चेपण हाडपाचो यत्न करपाक शकता.
मुखेली बाबर आजम धांवड्यो करतना संघर्श करतना दिसता, जाल्यार मोहम्मद रिजवानाक लेगीत अजून मेरेन सर्वोत्कृश्ट प्रदर्शन करपाक जमूंक ना. बांगलादेशा आड 128 धांवड्यांचो फाटलाव करतना ताचे बॅट्समन धडपडटना दिसले. पूण, ताची बॉलींग जबरदस्त आसा.
दुसरे वटेन न्युझिलॅण्डान अजून मेरेन बॅटींग आनी बॉलींग दोनूय विभागांनी बरें प्रदर्शन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
