भांगरभूंय | प्रतिनिधी
भांगरभूंय । प्रतिनिधी
म्हापशेंः कालवी पूल जाल्या उपरांत आडनदर जाल्लो कारोणा फेरीबोट धक्को सध्या अनैतीक वेव्हाराचें केंद्र जाला. थंय आशिल्ले प्रवाशी शेडींत बसून लोक सोरो पियेतात आनी हेर कारणा खातीर तिचो वापर जाता अशें दिसून आयलां.
18 फेब्रुवारी 2012 दिसा दनपरां कारोणा धक्क्यार बस उदकांत वचून प्रिया साळगांवकार, डायना डायस, एल्विना डायस, निगेल ग्रासिएस ह्या विद्यार्थ्यांक तशेंच जोझफिन डायस आनी दयानंद होबळे हांका उदकांत बुडून मरण आयिल्ले. हे दुर्घटने उपरांत सरकारान 64 कोटी रुपये खर्च करून कालवी न्हंयेचेर पूल बांदून 13 ऑक्टोबर 2013 दिसा तो येरादारीक उक्तो केल्लो.
तेन्नाच्या फेरी धक्क्यार बांदिल्ली प्रवाशी शेड मोडून उडयनास्तना तशीच दवोरली आनी सध्या ती अनैतीक वेव्हाराचें केंद्र थारल्या. पूल जाल्या उपरांत ती सरकारान मोडून उडोवपाक जाय आशिल्ली. ती तशीच दवोरल्ल्यान कांय जाण तिचो उपेग वायट कामा खातीर करतात अशें एका ग्रामस्थान सांगलें. हळदोणे पंचायत आनी सरकरान हातूंत लक्ष घालून थंय चलतात ते वेव्हार बंद करचे अशी थळाव्या लोकांनी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
