भांगरभूंय | प्रतिनिधी
ऑस्ट्रेलियेंत सध्या चालू आशिल्ली टी- 20 विश्व करंड क्रिकेट सर्त आतां निमाण्या पांवड्यार पावल्या. सर्तींतले सगळ्यांत बऱ्या चार पंगडांनी उपांत्य फेरयेंत पावलल दवरलां. भारत, पाकिस्तान, न्यूझीलंड आनी इंग्लंड हे चार पंगड निमाण्या चारांत आसात. अर्थांत भोवतेकांक दक्षीण आफ्रिका उपांत्य फेरयेंत पावतलो, अशें दिसतालें. उपांत्य फेरयेंतली पयली मॅच 9 नोव्हेंबराक म्हणल्यार फाल्यां पाकिस्तान आनी न्यूझीलंड हांचे मदीं जातली. उपांत्य फेरयेंतली दुसरी मॅच 10 तारखेक भारत आनी इंग्लंड हांचे मदीं जातली. दोनूय मॅचींचे जैतिवंत आयतारा 13 नोव्हेंबराक खिताबा खातीर एकामेकां आड झुजतले.
उपांत्य फेरयेंत पात्र थारपी चार पंगडांतल्या भारत आनी न्यूझीलंड हांणी प्रभावी कामगिरी करून उपांत्य फेरयेंत पावल दवरलें. भारत आनी पाकिस्तान हांचे मदली आंगार रोमांच हाडपी मॅच भारतान जिखली. एका वेळार मॅच भारताच्या हातांतल्यान पुरायपणान गेल्ली. 32 धांवड्यांचेर 4 बळी अशी स्थिती आशिल्ली. पूण, विराट कोहलीन हार्दिक पांड्यांक हाता कडेन धरून भारताक अशक्य जैत मेळोवन दिलें.
बांगलादेशा आड जाल्ली मॅचय रोमांचक आशिल्ली. बांगलादेशाच्या सलामीवीर लिटन दासान बांगलादेशाक वादळी सुरवात करून दिली. उपरांत पावस पडून भारताक आदार जालो आनी आमी ती मॅच जिखली. न्यूझीलंड मात सामको झेतान उपांत्य फेरयेंत पावलो. तर सुदारीत धांवड्यो दराच्या बळग्यार इंग्लंड उपांत्य फेरयेंत पावलो.
पाकिस्तान सर्तींतल्यान भायर पडटलो अशें सगल्यांकूच दिशिल्लें. तो उपांत्य फेरयेंत पावला हाचेर पाकिस्तानाच्या खेळगड्यांचोच अजून लेगीत विस्वास बसूंकना आसतलो. पाकिस्तानाच्या खेळगड्यांनी कराची परत येवपाची तिकेट काडिल्ली. मात जें जालें, तें वेगळें. क्रिकेटांत कितेंय घडूंक शकता अशें म्हणटात, तें खरें. आयतारा तें घडलें. दक्षीण आफ्रिका आनी नेदर्लंड्स हांचे मदीं मॅच जाली. दक्षिण आफ्रिका हे सर्तींत एक बळिश्ट पंगड म्हणून वयर सरिल्लो. तांचे सगळे खेळगडे फॉर्मांत आशिल्ले. तांणी भारताकय हारयिल्ले. देखून नेदर्लंडसा सारकिल्या दुबळ्या पंगडाक सोंपेपणी हारोवन तो उपांत्य फेरयेंत पावतलो अशें सगल्यांकूच दिशिल्लें. पूण, तांकां नेदरलॅण्डा आड हार खावची पडली. ‘चोकर्स’ ही दक्षीण आफ्रिकेक दिल्ली उपाधी आनी हो पंगड ह्या वेळारूय ताका जागलो. कारण व्हड सर्तींत ऐन वेळार हार घेवन सर्तींतल्यान पिड्ड्यार जावपाची तांकां संवयूच आसा. टी- 20 वर्ल्ड कप आसूं वा वनडे वर्ल्ड कप, दक्षीण आफ्रिका सदांच एक बळिश्ट पंगड म्हणून मुखार येता आनी तोच जिखता अशें 99 टक्के लोकांक दिसता तेन्ना तो अचकीत हारता आनी सर्तींतल्यान भायर पडटा. ताकाच लागून तांकां ‘चोकर्स’ म्हणटात. हे खेपेय तशेंच जालें. नेदर्लंडसा आड दक्षीण आफ्रिका हारलो आनी पाकिस्तानाक लॉटरी फुटली. कराचीक वचपा खातीर बॅगां भरपी पाकिस्तानी खेळगडे मेलबर्नाक वचपाची तयारी करपाक लागले.
पाकिस्तानान रडत रडत उपांत्य फेरयेंत पावला. जेन्ना- जेन्ना ते उपांत्य फेरयेंत नशिबान पावल्यात, तेन्ना- तेन्ना उपांत्य फेरी, फायनल जिखून तांणी खिताब जिखपाचो इतिहास घडयला. ताका लागून ते धोक्याचे थारूं येतात. 1992 वर्साय तो सर्तींतल्यान भायर पडिल्लो, पूण नशिबान हात दिलो आनी तो उपांत्य फेरयेंत पावलो. मुखार संवसारीक जैतिवंत थारलो. अर्थांत हे खेपे उपांत्य फेरयेंत तांचो विरोधक न्यूझीलंड बळीश्ट आसा. देखून पाकिस्तानाक तांचे आड जैत मेळोवप दिसता तितलें सोंपें वच्चें ना. भारत आनी इंग्लंड हांचे मदीं जावपी उपांत्य फेरयेंत भारताचो पंगड इंग्लंडा परस श्रेश्ठ आशिल्ल्यान भारताक जैत मेळूं शकता. बॅटींग, बाॅलिंगेत, खास करून स्पिन बाॅलिंगेंत भारत इंग्लंडा परस श्रेश्ठ आसा. ही मॅच एडिलेडांत जाता. थंयचें मैदान स्पिनाक आदार दिता. देखून भारताची बाजू पेजाद आसा.
इतलेंच न्हय तर एडिलेड मैदानाचेर विराट कोहलीन आतां मेरेन खूब धांवड्यो काडल्यात. ह्या मैदानाचेर तो खेळ्ळाच खेळ्ळा. ताका लागून आमी ही मॅच जिखतले आनी उपरांत फायनलींतय जैतिवंत जावं शकतात, अशी आशा आसा. संवसारीक खिताब मेळोवपाक भारत फक्त दोन पावलां पयस आसा. भारतीय पंगडाक शुभेत्सा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
