भांगरभूंय | प्रतिनिधी
भांगरभूंय । प्रतिनिधी
पेडणेः मांद्रेच्या दर्या देगेर पर्यटन वेवसायाक सुरवात जाल्या. थंय येवपी पर्यटकांक तयार कपडे विकपाच्या नांवान तांची सतावणूक करपी विक्रेत्यांचेर पर्यटन पुलिसांनी कारवाय करपाक सुरवात केल्या. कांय विक्रेत्यांक तांणी ताब्यां घेवन कडक समज दिवंन सोडलें. लमाणी लोक दर्या देगेर स्टॉल उबारून कपडे विकपाचो वेवसाय करतात. चडशे लोक दर्या देगेर फिरून कपडे विकतात. मोरजी, मांद्रे, आश्वे, हरमल दर्या देगेर कपडे विकपी लोकांचो आंकडो वाडत आसा.
पर्यटनाच्या नांवा खाला पेडणे तालुक्यांतल्या दर्या देगांनी दर वर्सा अवैद वेवसाय सुरू आसतात. लमाणी लोक दर्या देगानी बेकायदेशीरपणान पर्यटकांक मसाज करतात. ताचेर कारवाय केल्ली मात दिसना. लमाणी बायलो आनी चलयो पर्यटकांक त्रास करतात.
पर्यटन सिझन नोव्हेंबर तें एप्रील मेरेन चलता. कमी वेळांत चड पयशे जोडपाच्या हिशेबान कांय लोक गैर मार्गान वेवसाय करून पर्यटकांची लुबाडणूक करतात. देश- विदेशी पर्यटकांची सतावणूक करपी लमाणी आनी हेर लोकांचेर कारवाय करपाक मुख्यमंत्री डॉ प्रमोद सावंत हांणी पुलिसांक सांगलां. पेडण्यातल्या दर्या देगांनी ताची खरसाणेन अंमलबजावणी करची अशी थळाव्या लोकांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
