भांगरभूंय | प्रतिनिधी
भांगरभूंय । प्रतिनिधी
वास्कोः भाजी मार्केटांतल्या रस्त्याचेर अतिक्रमण केल्यार सोसून घेवचे नात अशी शिटकावणी दिवपी मुरगांव पालिका मंडळा सामकार थंयच्या विक्रेत्यांनी अतिक्रमणा काडनास्तना एके तरेचें आव्हान दिलां. पालिका मंडळाच्या मोवपणाक लागून विक्रेत्यांचो आंकडो तशेंच तांची दादागिरी वाडत आशिल्ल्याचें चित्र सध्या दिश्टी पडटा. वास्को रेल्वे स्टेशना सामकारच्या रस्त्यार चिकन रस्सा-आम्लेट विकपी हातगाडे लावनू फूटपाथ आनी रस्तो आडायतात. मुरगांव पालिका मंडळाचे विक्रेत्यां सामकार कांयच चलना अशी सध्या परिस्थिती आसा.
भाजी मार्केटांत भाजी, फळां आनी हेर वस्तू विकपी विक्रेते रस्त्यांचेर अतिक्रमण करून थंय आपलो माल दवोरतात. ताका पालिका मंडळाची, पालिका निरीक्षकांची
मातूय भिरांत दिसना. इतली धिटाय तांचे मदीं येवपाक तांच्या फाटल्यान कोणाचो हात आसा हे विशीं साबार लोक चर्चा करतना दिसतात. विक्रेत्यांनी आपलीं दुकाना रिती दवोरून दुकानांतलो माल दुकाना सामकार रस्त्याचेर दवोरून ते तो विकतात. ताका लागून गिरायकांक मेकळेपणान फिरपाक मेळना. विक्रेत्यांक ते संबंदी विचारल्यार ते शाणपणा सांगतात.
वास्को पुलिसांनी विक्रेत्यांक समज दिवंन रस्त्याचेर माल दवोरल्यार कारवाय करपाची शिटकावणी दिल्ली. मात दुसऱ्याच दिसा तांणी परत रस्त्याचेर माल दवोरपाक सुरवात केली. तांचेर कारवाय जायना देखून लोक मुरगांव पालिका मंडळाच्या नांवान बोटां मोडपा बगर दुसरें कांय करपाक शकनात. आमचे कडेन कामगार नात, पाँयंट ऑफ सेल मशिन ना अशें सांगून पालिका वेळ मारून व्हरता.
वास्को रेल्वे स्टेशना सामकार हातगाड्यांनी रस्सा- आम्लेट, पाव, चा-भाजी विकतात. हांगा पयलीं कोल्ड ड्रींक विकपी गाडे आशिल्ले. ताकां थंयच्यान काडून पोरण्या बसस्टॅण्ड वाठारांत तांची पुनर्वसणूक केल्या. तांचे सुवातेर आतां हातगाड्यांनी अतिक्रमण केलां. फुटपाथाचेर अतिक्रमणा आड कारवाय केली ना जाल्यार न्यायालयाच्या अवमानाक तोंड दिवचें पडटलें हाची जाणीव जाल्ल्यान हातूंतल्यान मार्ग काडपा खातीर मुरगांव पालिका मंडळान अफलातून कल्पना चालीक लायल्या. तांणी फूटपाथाचेर समांतर शिमीट क्राँक्रिटाचे प्लॅटफॉर्म बांदून थंय हातगाडेवाल्यांची वेवस्था केल्या. कांय दीस थंय हातगाडेवाल्यांनी वेवसाय केलो. आता फूटपाथ तांणी परत ताब्यांत घेतला. शिवाय रस्तार लेगीत अतिक्रमण केलां. फूटपाथाचेर ते खुर्च्यो, उदकाच्या व्हडल्यो बाटल्यो आनी कोयरा बॉक्स दवोरतात. अतिक्रमण केल्ल्यांचेर कारवाय करपाक पालिका मंडळ कित्याक अनमनता हें कुवाडें सध्या वास्कोकारांक पडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
