भांगरभूंय | प्रतिनिधी
घुंवळे वखदांक लागून आमचें सुपुल्लें सोबीत गोंय “उडटें गोंय” जालां, अशें कोणेंय म्हणलें काय नीज गोंयकारांक तिडक मारता. हो आरोप जाता, तेन्ना जें सरकार सत्तेर आसा, ताचे वावुरपीय सामके खुबळटात. मात, राज्यांत घुंवळे वखदां विकपी, वापरपी मनशांक जेन्ना धरतात, तेन्ना गोंय खरेंच उडटा, हें दुखेस्त अंतस्कर्णान मानून घेवचेंच पडटा. हैदराबाद – घुंवळे वखदां अंमलबजावणी विभागान (एच- एनईडब्ल्यू) शुक्रारा रातीं उसरां कर्लीस शॅक्स चलोवपी एडवीन न्यूनीस (पिराय 45 वर्सां) हाका अटक केल्या. ताचेर हैदराबादच्या अधिकाऱ्यांनी खूबच गंभीर आरोप केल्यात. ते गोंयाक, गोंयचे तपास यंत्रणेचें नांव म्हेळें करपी आसात. घुंवळे वखदांच्या गैरवेव्हारां आड खर कारवाय करचे बदला सरकारी यंत्रणेन सदळसाण दाखयली ताचे हे परिणाम म्हय मूं? हैदराबादान गोंयांक दिल्लो हो खर धपकोच. 1970 च्या दशका सावन गोंय घुंवळे वखदां खातीर गाजत आयलां. हालींच्या कांय वर्सांनी तर ड्रग्सांक हुंवारूच आयिल्लो दिसता. पाव किलाच्या ड्रग्साचें मोल लाख रुपया म्हणटकच पयशांचे आशेन करबट- बुराटे सगले गोंयचे दिशेन वळ्ळ्यात. पुलिसांचे कारवायेंत तेच सांपडटात. मात व्हडलें नुस्तें कशेंच फारवना, मात आतां तें फारावतलें, अशी आस्त.
हैदराबादांतल्या ड्रग्स प्रकरणांत फोंडेंच्या प्रितेश बोरकार हाचें नांव आयलें आनी ताका गोंयांत अटक करून थंय व्हरतकच ताणें स नांवां सांगलीं, ताचे वयल्यान नुनीस हाका अटक केल्या, अशी म्हायती पुलीस आयुक्त सी व्ही आनंद हांणी दिल्या. नुनीस हो मुखेल सुत्रधार. ताचे तीन आलीशान बंगले, तीन हाॅटेलां आसात. तशेंच ताचे सरकारी यंत्रणेंत जायते बरें मागपी आसात, असो दावो आनंद हांणी केला. नुनीसा आड चार केशी गोंयांत तर तीन हैदराबादांत नोंद जाल्यात. गोंयांत एका पुलीस स्टेशनांत जामिना संबंदीचे सोपस्कार पुराय करून भायर सरतना हैदराबाद पुलिसांनी ताका ताब्यांत घेतलो. पुलीस आयुक्त आनंद दावो करतात ते प्रमाण, “नुनीस प्रकरण दिसता तितलें सादें ना. गोंय पुलिसांक ताचो मनस्ताप जातालो, कारण ताच्या बऱ्या मागप्यां खातीर ते ताका धरपाक शकनाशिल्ले. ताचें नेटवर्कूय तांकां उध्वस्त करपाक जमनाशिल्लें. आता नुनिसाक अटक केल्ल्यान गोंयचो मुखेल ड्रग्स सुत्रधार बंदखणींत गेला अशें आमी म्हणपाक शकतात. देशभर पुरवण करचे पयलीं तो ड्रग्स खंयच्यान हाडटालो हाचो सोद घेवप हें खरें आव्हान आसा. सगल्यांनी तें सोदपाक मजत करपाक जाय.”
आनंद हांणी जें कितें सांगलां, तें फट हें सिद्ध करपाची आतां गोंय पुलिसांची जापसालदारकी. ताचे परस तांणी नुनिसाक मजत करपी कोण तें उक्ताडार हाडपाक पावलां उबारल्यार बरीं. सरकारी प्रशासनांत बरे मागपी आसात, असो दावो वा आरोप हैदराबाद पुलिसांनी केला. ते सरकारी अधिकारी काय फुडारी, तें तांकांच खबर आसतलें. तीं नांवां भायर येवचीं. गोंय पुलिसांनी आपले परीन हें प्रकरण हाताळून वेगान तपास करुंक फावो. दोन दीस धोल वाजोवप आनी मागीर खंयचे कडेन कांय ना, अशें जावपाक फावना. हैदराबाद पुलिसांनीय गोंय पुलिसांचे मजतीन ह्या प्रकरणाचो सोक्षमोक्ष लायत जाल्यार ते तरणाटे पिळगेचेर केल्ले व्हड उपकारूच थारतले. कारण ड्रग्सांचो पयलो धपको हो तरणाट्यांकूच बसता. पयसो तर सोंपताच, पूण ताचेकूय म्हत्वाची आशिल्ली भलायकी इबाडटा. हैदरबाद पुलिसांक चवकशे उपरांत स नांवां मेळ्ळ्यांत आनी ते दिशेन तांचो तपास चालू आसतलो. पळोवया कितें भायर सरता तें.
कर्लीस शॅक्स उजवाडाक आयलो तो भाजपाचे फुडारी सोनाली फोगाट हिच्या मरणान. घुंवळे वखदां दिवन तिका मारली, इस्टेटी खातीर खून केलो, अशे साबार आरोप जाल्यात. तांचो तपास चालू आसा. कांय जाणांक अटकूय केल्या. तपासांत वेटरांनी रुमांत ड्रग्स व्हरून दिल्ले अशें पुलिसांक कळ्ळें…. आनी तातूंतल्यान हो शॅक्स उजवाडांत आयिल्लो. तेवटेन ड्रग्सा संबंदीच्याच प्रकरणांत हैदराबाद पुलीस शॅक्स चलोवपी नुनीस हाका दोन म्हयने सोदताले. शुक्रारा तांणी ताका ताब्यांत घेतलो. गोंयांत ड्रग्सा आड खर पावलां उबारपाचें सरकारान हालींच जाहीर केलां. आतां तांणी फाटीं सरचें न्हय. एक घाव, दोन कुडके ह्या न्यायान हें प्रकरण हाताळचें. मात हें करतना मुखेल सुत्रधारांक पयलीं खडी फोडपाक धाडचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
