भांगरभूंय | प्रतिनिधी
भांगरभूंय । प्रतिनिधी
बेळगांवः आयतारा सकाळीं जाल्ले पांचवे बेळगांव हाफ मॅरेथॉन सर्तींत कर्नाटक, गोंय आनी महाराष्ट्रांतल्या 1200 सर्तकांनी वांटो घेतिल्लो. हे सर्तीत असोसिएशन ऑफ इंटरनॅशनल मॅरेथॉन्स अॅण़्ड डिस्टन्ट रेसीस (एआयएमएस) हांची मान्यताय मेळ्ळ्या लेकव्ह्यू फावंडेशन आनी रेस मॅनेजमेन्ट भागिदार यूटू कॅन रन हांच्या पालवान ही सर्त आयोजीत केल्ली. गोल्फ प्रॅक्टिस मैदाना वयल्यान ती सुरू जाली.
21 किलोमीटर, 10 किलोमीटर आनी 5 किलोमीटर अशें तिचें अंतर आशिल्लें. एमएलआयआरसीचे स्टेशन कमांडन्ट ब्रिगेडीयर जयदीप मुखर्जी हांणी मुखेल सर्तीक बाबटो दाखोवन सुरवात करून दिली. बेळगांवचो उपायुक्त नितेश पाटील हांणी दुसरे आनी डीआयजी रविंद्रन हांणी तिसरे सर्तीक सुरवात करून दिली. ह्या वेळार निराणी शुगराचे एमडी संगमेश निरानी, उत्तर बेळगांवचे आमदार अनिल बेनाके हाजीर आशिल्ले.
लेकव्ह्यू फावंडेशनाच्या डॉ शशिकांत कुडगोड, डॉ गिरीश सोनवालकर, व्यंकटराम पी हांणी मॅरेथॉनाचे बेस बरे भशेन आयोजन केलें. सर्तीं वांटो घेवपी सर्तकां मदी 35 टक्के बायलांचो आसपाव आशिल्लो. जायत्या जाणी मॅरेथॉन सर्तींत पयलेच फावट वांटो घेतिल्लो. एएमएफ नंदिनी, व्यायव्या लॅब, स्नेहम इंटरनॅशनल आनी टायटन हांणी ही सर्त प्रोयोजीत केल्ली. सुमार 5 लाख रुपया मोलाची इनामां आनी टायटन स्मार्ट घडळ्या इनाम म्हणन दवोरिल्लीं. बंगळुरूचे 90 वर्सां पिरायेचे जनार्दन तसेंच महेश्वरी ब्लांयड स्कूलाचे विद्यार्थी सर्तींत वांटेकार जाल्ले.
हॉफ मॅरेथॉन सर्तींत दादल्यां खातीर पी डी चौगुले कप दवोरिल्लें. चौगुले हांणी 1920चे ऑलिम्पिकांत मॅरेथॉन सर्तींत भारता वतीन वांटो घेतिल्लो. ताचे यादी खातीर हे कप दवोरिल्लें. मोहम्मद साहील अन्निगेरी हांणी दादल्यांच्या गटांत 50 हजार रुपयाचें पयलें इनाम मेळयलें. बायलांच्या गटांत प्रिनू यादव हिका हें इनाम फावो जालें. सर्त पुराय केल्ल्यांक पदका, ई प्रमाणपत्रां दिलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
