भांगरभूंय | प्रतिनिधी
खबरां संस्था
मेलबर्नः टी-20 वर्ल्ड कपाचे सुपर 12तले आपले निमाणे मॅचींत भारतान झिम्बाब्वेचेर 71 धांवड्यांनी जैत मेळयलें. सूर्यकुमार यादवाची तुफानी खेळी आनी लोकेश राहुलाच्या अर्द शेंकड्याच्या नाड्यार भारतान झिम्बाब्वे सामकार जैता खातीर 187 धांवड्यो करपाचें आव्हान दवोरलें. मात भारताचे बॉलिंगे सामकार झिम्बाब्वेक तें हातासप शक्य जालें ना. टी-20चे उपांत्य फेरयेंत भारताचो प्रवेश हे मॅची पयलींच निश्चीत जाल्लो. मात ही मॅच जिखून भारतान ग्रूप दोनांत 8 गुणांनी पयली सुवात राखून दवोरली. उपांत्य फेरयेंत तांच्या सामकार इंग्लंडाचें आव्हान आसतलें.
टॉस जिखून पयलीं बॅटिंग करपी भारतान 20 ओव्हरींत 5 बाद 186 धांवड्यो केल्यो. हे मॅचींत दिनेश कार्तिकाचे सुवातेर ऋषभ पंताक संद दिल्ली. ओपनर आनी कॅप्टन रोहीत शर्मा व्हडली खेळी करपाक परत एक फावट अपेशी थारलो. 15 धांवड्यो करून तो आवट जालो. ते उपरांत आयिल्ल्या विराट कोहलीन केएल राहुला वांगडा 60 धांवड्यांची भागिदारी करून पंगडाक व्हडली धांवसंख्या उबारपाक मजत करपाचो यत्न केलो. राहुलान हे खेपे अर्द शेंकडो केलो. टी-20 वर्ल्ड कपांतले हो ताचो सेगीत दुसरो अर्द शेंकडो आशिल्लो. ताणे 3 चौके आनी 3 सक्यांनी 51 धांवड्यो केल्यो. तशेंच सूर्यकुमार यादवान 25 बॉलांत 61 धांवड्याची नाबाद खेळी केली. ताणे मॅचीच्या निमाणे कांय अशे शॉट मारले ते अजापीत करपी आशिल्ले. ताणे 6 चौके आनी 4 सके हुबयले. ह्या दोगांय वांगडा विराट कोहली (26) आनी हार्दिक पंड्यान (18) दोन आंकडी धांवड्यो करून धांवसंख्येक मोलाचें योगदान दिलें. ऋषभ पंत फकत तीन धांवड्यो करपाक शकलो. झिम्बाब्वेच्या शॉन विलियम्सान 9 धांवड्यांत 2 विकेटी घेतल्यो. सिकंदर रझा, ब्लेसिंग्स मुझरबानी आनी रिचर्ड नगारवान दरेकी एक विकेट घेतली.
झिम्बाब्वेचो डाव 17.2 ओव्हरींत 115 धांवड्यांत सोपलो. सिकंदर रझा, रायन बुरी, क्रेक एडर्वीन आनी विलियम्स सोडून ताचें हेर बॅट्समन दोन आंकडी धांवड्यो करपाक शकले नात. सिकंदरान 24 बॉलांत 3 चौक्यांनी 34 जाल्यार रायन बुरीन 22 बॉलांत 5 चौके आनी एका सक्यान 35 धांवड्यो केल्यो. क्रॅग एर्वीन (13) आनी विलियम्सान 11 धांवड्यो केल्यो.
भारताचो स्पीनर आर आश्विनान 22 धांवड्यांत 3 जाल्यार मोहम्मद शमी आनी हार्दिक पंड्यान दरेकी दोन विकेटी घेतल्यो. भुबनेश्वर कुमार, अर्शदीप सिंग आनी अक्षर पटेलान दरेकी एक विकेट घेतली. अॅडलेड मैदानार 10 नोव्हेंबराक भारत आनी इंग्लंडा मदीं उपांत्य मॅच जातली. जर ती पावसाक लागून रद्द जाल्यार भारत फायनलींत पावतलो.
सूर्यकुमाराच्या 1000 धांवड्यो
एका वर्सांत 1000 टी-20 आंतरराष्ट्रीय धांवड्यो करपी सूर्यकुमार यादव भारतांतलो पयलो आनी संवसारांतलो दुसरो खेळगडो थारला. आयतारचे मॅची सयत सूर्यकुमारान 2022 वर्सा 28 डावांत 44.6चे सरासरीन आनी 186.54च्या स्ट्रायक रेटान 1026 धांवड्यो केल्यात. तातूंत एक शेंकडो आनी 9 अर्द शेंकडे आसात. हाचे पयलीं हो पराक्रम पाकिस्तानाच्या मोहम्मद रिझवानाच्या नांवार आशिल्लो. ताणे 2021 वर्सा 26 डावांत 1326 धांवड्यो केल्ल्यो.
भुबनेश्वराच्यो 10 डॉट ओव्हरी
टी-20 मॅचींत 10 डॉट ओव्हरी घालपी भुबनेश्वर कुमार संवसारांतलो पयलो बॉलर थारला. टी-20 आंतरराष्ट्रीय कारकिर्दींत सगल्यांत चड डॉट ओव्हरी घालपी बॉलर आता तो थारलां. जसप्रीत बुमराहान 60 मॅचीं 9 मेडन ओव्हरी घातिल्ल्यो, भुवीन 84वे मॅचींत 10 मेडन आोव्हरी घातल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
