भांगरभूंय | प्रतिनिधी
सुलक्षा तळकारः फुटबॉल खेळगडो विनय हरजीचो भोवमान
भांगरभूंय । प्रतिनिधी
पेडणें: खेळाक लागून शिस्त, वेळाचें तशेंच एकवटाचें म्हत्व कळटा. केरी गांवचो विनय हरजी हांणी फुटबॉल खेळांत मेळयिल्लें येस खऱ्यांनीच कवतुकाचें. फुटबॉल मळाचेर ताणें राष्ट्रीय तशेंच आंतरराष्ट्रीय पांवड्याचेर नांव जोडलां, ताचो आमकां अभिमान आसा, अशें केरीची सरपंच सुलक्षा तळकार हांणी सांगलें.
नवचेतन युवक संघ पेडणें हांणी करी पेडण्यां युवा फुटबॉल खेळगडो विनय विजय हरजी हाचो भोवमान सुवाळो आयोजीत केल्लो. ह्या वेळार सरपंच तळकार उलयताली. विनय हरजी हाणें ओडिशांत सेफांत अंडर- 20 फुटबॉल सर्तींत तशेंच कुवेतांत अंडर- 20 फुटबॉल सर्तींत भारताचें प्रतिनिधीत्व केल्लें. गोंयच्या धोंपो फुटबॉल पंगडाचो तो वांगडी आसा.
ह्या भोवमान सुवाळ्याक नवचेतना युवक संघाचे अध्यक्ष कृष्णा पालयेंकार, फुले शाहू आंबेडकर प्रतिश्ठानाचे अध्यक्ष महादेव गवंडी, उजो पालोवपी दळाचे जवान विठ्ठल परब, दत्ताराम कळंगूटकार, कलाकार संजना तळकार, एफसी केरीचे वेवस्थापक धनेश फरास, क्लबाचे वांगडी नरेंद्र नायक, अनंत गाड, शुभम नायक, प्रणय हरजी, विजय हरजी, अक्षय तळकार, विजय हरजी, जगन्नाथ सोमजी, महादेव हरजी, संजय हरजी, राजू सोपटे, संजय तळकार, महेश देसाय, अभिषेक नायक, साहील नायक, प्रथमेश हरजी, सुजीत भगत आनी हेर मानेस्त हाजीर आशिल्ले.
विनय हरजी हाणें मेळयिल्लें येस खऱ्यांनीच अभिमान दिसपा सारकें. एफसी केरी पंगडांतल्यान ताणें भारताचें प्रतिनिधीत्व केलें. हो प्रवास खऱ्यांनीच प्रेरणादायी. ताच्या ह्या वावरांत पेडणेंचें नांव वयर सरलां. ताणें खेळटना हेर खेळगड्यांकूय उर्बा दिवची आनी तांकां योग्य मार्गदर्शन करचें, अशें कृष्णा पालयेंकार हांणी सांगलें.
नरेंद्र नायक हांणी येवकार दिलो. महादेव गवंडी हांणी सुत्रसंचालन केलें जाल्यार धनेश फरास हांणी उपकार मानले.
तरणाट्यांनी फुटबॉला कडेन वळचें: विनय हरजी
नवचेतन युवक संघान केल्लो आपलो भोवमान आपले खातीर खूब म्हत्वाचो आसा. हे फुडेंय आपूण ह्या मळाचेर तरणाट्यांक सदांच उर्बा दितलों. तरणाट्यांनी फुटबॉल मळाचेर सराव करून ह्या खेळांत वांटो घेवप गरजेचें आसा, अशें भोवमान सुवाळ्यांत जाप दितना विनय हरजी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
