मोपा विमानतळाक भाऊसायबाचेंच नांव दिवचें

भांगरभूंय | प्रतिनिधी

मोरजी ग्रामसभेंत थाराव मंजूरः परंपरीक पांय वाटे सयत साबार थारावांक मंजुरी

भांगरभूंय । प्रतिनिधी

पेडणें: गोंयचे पयले मुख्यमंत्री भाऊसायब बांदोडकार हांचेंच नांव मोपा आंतरराष्ट्रीय विमानतळाक दिवचें, असो थाराव सगळ्यांच्या मतान तो मंजूर केलो. ते भायर मोरजी पंचायत वाठारांतल्यो परंपरीक पायवाटो मेकळ्यो करच्यो, माळरानाचेर चलिल्ल्या बेकायदो बांदकामांचेर नियंत्रण दवरचें, भौशीक रस्त्याचेर घातिल्ली गेट काडची, अशे थाराव थाराव ग्रामसभेंत मंजूर केले.

6 नोव्हेंबराक मोरजी पंचायतीची ग्रामसभा सरपंच सुरेखा शेटगांवकार हांचे अध्यक्षेते खाला जाली. ह्या वेळार उपसरपंच पवन मोरजे, तशेंच पंच रजनी शिरोडकार, सुप्रिया पोके, मंदार पोके, स्वप्नील शेटगांवकार, फटू शेटगांवकार, विलास मोरजे, मुकेश गडेकार, पंचायत सचीव हाजीर आशिल्ले.

सरपंच शेटगांवकार हांणी येवकार दिलो जाल्यार पंचायत सचिवान फाटले सभेचो इतिवृतांत वाचून कायम केलो.

मोपा विमानतळाक भाऊसायब बांदोडकार हांचें नांव दिवचें, असो थाराव साहित्यीक निवृत्ती शिरोडकार हांणी मांडलो. त्या थारावाचेर चर्चा जाले उपरांत तो मंजूर केलो. फुडलेल कार्यवाही खातीर तो सरकार दरबारांत धाडटले, अशी म्हायती सरपंच शेटगांवकार हांणी दिली.

सरपंच शेटगांवकार ही गोंयच्या पंचायत वेंचणुकांनी सगळ्यांत चड मतां घेवन जिखून आयिल्ले खातीर तांकां परबीं दिवपी थाराव मांडलो. तेच वरी वेंचून आयिल्ल्या आठ पंचांक परबीं दिवपी थाराव मांडून तो मंजूर केलो.

मोरजी पंचायत वाठारांत आदीं सावन व्हड प्रमाणांत देवदेवतांच्या कार्या खातीर वा दर्यादेग वाठारांत वचपी खातीर श्री मोरजाई देवीची पालखी वचपाची परंपरीक वाट, बकरा उत्सव मनोवपा खातीरची परंपरीक वाट आनी अश्यो साबार पांयवाटो आसात. त्यो आडावन सध्या बांदकामां केल्यांत. त्यो सगळ्यो पांयवाटो मेकळ्यो करपाची मागणी ग्रामसभेंत केली. ह्या वेळार उपसरपंच मोरजे हांणी योग्य निर्णय घेवन तशेंच थळाव्या लोकांक विस्वासांत घेवन फुडलो निर्णय घेतले, अशें उतर दिलें.

माळरानाचेर बेकायदो रस्तो, बांदकामां करतात. अश्या बांदकामां आड कादाळ करून लेगीत पंचायतीन आयज मेरेन कित्याक कारवाय करूंक ना, असो प्रस्न तुकाराम शेटगांवकार हांणी केलो. तशेंच रस्त्याचे कुशीक अतिक्रमण करून दुकानां घालतात, ते आपल्यो गाडयो पार्क करून रस्ते आडायतात, ते भायर उदकाचो प्रस्न, वीज समस्या हांचेर प्रस्न मांडून रस्त्या कुशीक, व्हाळांनी कोयर उडयतात तांचेर कारवाय करची, असो थाराव मांडलो. ह्या विशयाचेर खोलायेन चर्चा जाली.

न्यूवाडो वाठारांत व्हाळाचेर बांदकाम करून रस्तो केलो. ताका लागून मुख्य रस्त्याचेर उदक सांचता, ते भायर जांची हॉटेलां आसात तांणी आपल्या गिरायकां खातीर पार्कींग वेवस्था करूंक नाशिल्ल्यान गिरायक आपल्यो गाडयो रस्त्याचेर पार्क करतात. ताका लागून येरादारीची कोंयडी जाता. तांचेर कारवाय करची, अशी मागणी गजानन शेटगांवकार हांणी केली. ताचेर जाप दितना उपसरपंच मोरजे हांणी सांगलें, चार कडेन पार्कींग झोन जाहीर केल्यात. तरी लेगीत जे कोण नो पार्कींग झोनांत गाडयो पार्क करतले तांचेर चार दिसां उपरात येरादारी विभागा वतीन दंडात्मक कारवाय करतले, अशी म्हायती उपसरपंच मोरजे हांणी दिली.

गांवांत जे वेवसायीक घरां, दुकानां घरा भाड्याक दितात वा गेस्ट हावसां आसात, अशा वेवसायिकां कडल्यान पंचायतीन महसूल एकठांय करचो, असो थाराव फाटले ग्रामसभेंत मांडून लेगीत तशी कार्यवाही जावंक ना, अशी खंत दीपक शेटगांवकार हांणी उक्तायली.

देवकार्यां खातीर मेकळ्यो आशिल्ल्यो पांयवाटो सध्या बंद केल्यात. पंचायतीन फुडाकार घेवन त्यो मेकळ्यो करच्यो. ते भायर माळरानाचेर देवस्थान विधी करपाक वचपाचे परंपरीक पांयवाटेचेर गेट घातल्या. ती काडची, अशी सुचोवणी रामनाथ पवार हांणी केली.

पियेवपाच्या उदकाची समस्या सुटावी करचे खातीर व्हड आकाराची पायपलायन घालची. भुंयगत वीज केबल रस्ते खणिल्ल्यान रस्ते येरादारी खातीर पेड्डेर जाल्यात. पंचायतीन फुडाकार घेवन ही स्थिती सरकाराचे नदरेक हाडून दिवची, अशी सुचोवणी सोनू शेटगांवकार हांणी केली.

माळरानाचेर बेकायदो उबारिल्ल्या फार्म हावसा संबंदांत मयूर शेटगांवकार हांणी विचारिल्ल्या प्रस्नाक पंचायत मंडळाक समादान दिवपी जाप दिवपाक जाली ना. गरिबां खातीर आशिल्ल्यो येवजण्यो गरिबां मेरेन पावनात. पंचायत लेगीत तसो यत्न करिना. स्वयंमित्र ते संबंदांत म्हायती दिता काय ना, हाचेर स्पश्टीकरण दिवपाची मागणी गौतम शेटगांवकार हांणी केली.

सुभाष शेटगांवकार, आप्पा शेटगांवकार, संतोष शेटगांवकार, रामनाथ पबाव, अनंत शेटगांवकार आनी हेरांनी वेगवेगळ्यो समस्या ग्रामसभेंत मांडल्यो. ह्या वेळार विवीध विशयांचेर चर्चा करून विवीध समित्यो वेंचल्यो.

वेवसायीक जेटीक खर विरोधः अमीत मोरजे

मोरजी पंचायत वाठारांतल्या एकाय परंपरीक नुस्तेमार वेवसायिकान वेवसायीक जेटी बांदपाची मागणी करूंक ना. तरी लेगीत सरकार लीपचोरयां जेटी बांदपाक सोदता. वेवसायीक जेटीक नुस्तेकार भावांचो खर विरोध आसा, आनी तशा आशयाचो थाराव मंजूर करचो, अशी मागणी अमीत मोरजे हांणी केली. ते भायर मोरजी दर्यादेग ही संवेदनशील देग आसून लेगीत तो वेवसायीक झोन जाहीर केला. हाका लागून थळाव्यांक धोको निर्माण जावपाक शकता. हाका लागून वेवसायीक जेटी आनी सायलंट झोन हाका खर विरोध आसा, अशें मोरजे हांणी सांगलें.